England coach Roy Hodgson chuan Liverpool winger Raheem Sterling lakah rinna ala nghat ngam tih a sawi.
Kum 20 mi Sterling hian Liverpool chhuahsan a duh tih a chiang a, The Reds-in kar khatah £100,000 hlawh tura an sawmna pawh a hnar tawh.
Boruak neuh neuh nei mahse Sterling hian Pathianni zan khan England-in friendly match-a Republic of Ireland an draw (0-0) tumin inkhel bul a tan a, minute 66-naah Tottenham winger Townsend chuan a thlak.
An inkhelh zawh hnuin England coach Hodgson chuan Sterling chungchang hi a sawi a, "Vantlang hriatah hun khirh tak a tawng mek a, mahse khelh tir loh nachhan tur ka nei lo."
"Kan tan tha takin a lo khel tawh thin a, Ireland lakah kha chuan a che tha lo pawh a ni mahna mahse kei leh English national team-in a laka rinna kan hloh hun tur chu ala hla ang."
"Ka thlak chhan kha a khelhdanah ka lungawi loh vang pawh a ni em em lo, midang khelhtir ka duh vang a ni." a ti.
England hian EURO 2016 qualifying round-ah Slovenia an hmachhawn leh dawn a, Pathianni hian Stadion Stožice-ah an inkhel ang.
Kartawp International friendly match dang results:
Russia 4-2 Belarus
Serbia 4-1 Azerbaijan