11 Feb 2019 05:36

inkhel

Hockey inelnaah Mizoram pathumna

Kollam, Kerala khawpuia 9th Hockey India Junior Women National Championship 2019 (A Division) neihah Mizoram team chu Uttar Pradesh nen inkhelin, Mizoram hi 2-0 in an chak a, pathumna lawmman an la.

He inkhelah hian Lalrinfeli chuan 1st quarter minute 14-naah goal khungin, 1st quarter-ah hian goal dang a awm belh lo a. Second quarter an tan leh a, minute 4-ah F. Lalawmpuii chuan goal a khung ve leh a, Mizoram chuan 2-0 in hma an hruai theih phah a ni.

An khelh chhunzawm leh zel a, hun tawp thlengin team pahnihte hian goal dang an thun belh tawh lo ve ve a, Mizoram chu 2-0 in an chak a, pathumna an ni thei ta a. Mizoram team hi an game a mawiin, fak an hlawh hle.

9th Hockey India Junior Women National Championship 2019 (A Division) hi January 31 khan tanin, February 10 khan a hmawr an bawk a. Mizoram hi semi final-ah an chak zo lo a, semi final lehlama chak zo lo Uttar Pradesh nen hian pathumna dinhmun luah thei tur an zawng ta a ni.

Mizoram team te hian February 12 hian Kollam, Kerala an chhuahsan ang a, February 15 ah Guwahati thleng hman tura beisei an ni.

He tournament ah hian Marina Lalramnghaki chu Best Midfielder of the Tournament atan thlan a ni a. Mizoram team te hi an mikhual lo hle a, match official zingah KT Lalhlimpuii a tel a, Mizoram Hockey Association te’n India ram hockey khawvelah hmun pawimawh an luah zia a tilang chiang hle.

Mizoram coach Lalrothuami (Bte-i) chuan player te’n an theihtawp an chhuah thu sawiin, "Semi final-ah Mizoram hi felhlel taka tihtlak niin, rilru na takin awm mahse, pathumna inchuhnaah an theihtawp an chhuah a, an thawhrimna, inpekna leh an inthunun theihna vanga hetiang dinhmun thleng thei hi kan ni," a ti. Mizoram Hockey Association in national tournament-ah official an nei thei chu thlamuanthlak a tih thu a sawi tel bawk.

Mizoram Hockey Team:

1. F. Ramenmawii - Lunglei

2. Lalrinmuani - Ramlaitui

3. C.S. Ramsangliani - Dungtlang

4. F. Lalawmpuii - Tuipui 'D'

5. Merabi Lalruatfeli - Tuipui 'D'

6.Lalrindiki- Hnahthial

7. Lalrinfeli - Hnahthial

8. Lalruatfeli - Hnahthial

9. Lalremruati - Hnahthial

10. Lalneihpuii - Denlung

11. Zodinpuii - Bunghmun 'W'

12. Lalruatdiki - Bunghmun 'W'

13. Lalthantluangi - Kanghmun 'S'

14. Lalenkawli - Thenzawl

15. Laltlanchhungi - Durtlang

16. Lalsangzuali - Sihphir

17. Marina Lalramnghaki - Kawnpui

18. Lalrinchhani - Kolasib

19. Agnes Malsawmkimi - Serchhip

20. Lalpeksangi - Rotlang 'W'

Coach : Lalrothuami (Bte-i) - Mamit

Manager : R. Lalnunmawii - Kawnpui