2018/19 Premier League season tan a ni a, match hmasa berah Manchester United chuan Old Trafford-ah 2-1 in Leicester City an hneh. United tan hian Pogba chuan penalty atangin goal a khung bakah Luke Shaw chuan goal khat a khung bawk a, hun tawp dawn tak takah Vardy chuan goal khat a khung ve bawk.
World Cup champion Pogba chu United innghahna a ni a, Fred erawh Premier League-ah a la insiamrem thei lo deuh. James Maddison chuan Foxes tan a debut game a khel tha hle a, goal pawh a khung teuh hle nghe nghe a ni.
Manchester United 2-1 Leicester City
(Pogba 3' pen, Shaw 83') (Vardy 90+2')
PLAYER RATINGS
Manchester United: De Gea 7, Lindelof 7, Bailly 7, Shaw 8, Darmian 5, A Pereira 6, Fred 6, Pogba 9, Sanchez 7, Mata 6, Rashford 5. Subs: Grant, Lukaku 6, Fellaini 5, McTominay 5.
Leicester City: Schmeichel 8, Chilwell 6, Morgan 5, Maguire 6, R Pereira 6, Amartey 5, Silva 6, Ndidi 6, Maddison 8, Gray 7, Iheanacho 6. Subs: Vardy 7, Iborra 5, Ghezzal 5.
Inkhelh tan atanga minute thumna lekah Daniel Amartey handball avangin Manchester United chuan penalty an hlawhchhuak a, he penalty hi Pogba chuan goal-ah a chantir. Hun tawp dawn minute 7 a la awm tihin Mata ball vawrh tha zet chu Luke Shaw chuan dawngin Ricardo Pereira a tlanpelh hnuah box veilam sir atangin mawi takin a pet goal.
Bench atanga lut Vardy chuan 90+2 mins-ah goal khat a rawn khung ve leh hram a, mual dinglam sir atanga Ricardo Pereira ball vawrh tha zet chu tuman an khawih lo, United goal post a per a, hemi per hi Vardy chuan a tauh goal chhunzawm, Foxes hian an siphurh rul tum hle mahse hunin a daih ta lo, 2-1 in mual neitu United chuan hnehna an chang ta a ni.
World Cup-a che ropui lo tak De Gea chuan a thiam a la theihnghilh lo chiang, James Maddison shot tha zet chu a kut dinglamin a lo dan sak a, hun tawp dawnah Vardy-a cross Gray-a shot chu a lo dan sak bawk. United tan bench atanga lut Lukaku chuan clear chance a thelh, Sanchez-a ball pek tha zet chu goalkeeper chiah a hmachhawn tawh tihin a pet goal lo.
Lukaku hian goalkeeper kap karah a pet, mahse Kasper Schmeichel chuan a kein a lo khawih per hman, ball sawt hi a over chiah chiah bawk a ni. Vardy pawhin goal a khung hmain chance tha lutuk a hmu, United tlarhnung pherh lai takin clear chance a nei a, mahse a volley over hlauh mai.
United hian tan atanga minute 3-na lekah goal an khung, Leicester City-in na takin an nawr let nghal a, United an tawm tawk, hetih lai hian an tlarhnungte an khel tha, Bailly a awm hi chuan United tlar hnung a phui tha thin hle. Second half-ah erawh United game a rawn dik tan a, bul tan tha lo tak Fred pawh a insiamrem chho tan, mahse beisei erawh a phak rih lo.
Luke Shaw a khel tha hle a, attacking a pui nasa thin hle. Loan-a an chhuahtir hnua an kohkir Pereira chu midfield lailum luahtu a ni a, a khel tha tak zet bawk. Hun tawp dawnah lakchhuah ni mahse inkhelh pumpuia United chakna hnar chu Pogba a ni kan ti thei awm e.
Inkhelh zawhah Jose Mourinho chu transfer market an hman danah a la lawm lo reng tih a hriat. "Hun rei tak ata tun season atana ruahmanna ka nei, mahse transfer market-ah player kan lalut tam lo. Tun season chu a hautak dawn hle mai, mahse keini tan chauh ni lo, team tin tan a hautak dawn, " tiin Jose chuan a sawi.
An khelh danah Jose chuan, "Ka regular player 6 lai ka siksawi, chutah Leicester City kan hmachhawn bawk a, team tha tak kan hmachhawn niin ka hria. Na taka min nawr laiin kan khelh dan tura ka ruahman anga khel turin ka fuih reng.
"Second half-ah erawh kan duh danin kan khel thei ta a, kan attack na, mahse ka midfielder pahnih ten yellow card an hmuh tawh avangin ka duhthusam angin kan khel thei ta lo, Martial dah luha, na taka nawr chhunzawm ka tum laiin midfield kan talbuai loh nan Fellaini leh Scott McTominay ka dahlut ta zawk a, engpawh nise hnehna nen bul kan tan a, result tha a ni e," tiin a sawi bawk.