Vawiruk lai world champion ni thei Miguel Cotto chuan kum 16 chhungzet a chenchilh tawh Boxing khawvel a chhuahsan ta a, a inhnekna hnuhnung berah erawh a tlawm a Sadam Ali a hneh lo.

Kum 37 mi Cotto leh Ali hi New York-ah inhmachhawnin kum 29 mi Ali hian unanimous points-decision hmangin hnehna a chang a, an point hmuhdan chu 115-113, 115-113, 116-112 a ni.

Puerto Rican boxer Cotto hian WBO light-middleweight kawnghren a kawllai a humhim hnuah boxing a chawlhsan dawn tih sawi mahse Ali lakah a humhim zo ta lo va, Madison Square Garden-a inhnekah hian a banpuam a hliam a hei vang hian duh angin a che thei lo.

Ali nen an inhnek zawh hnuin Cotto chuan, "Ka țha e, tunah chuan in lamah chhungte nen hun hlimawm tak hman ka duh tawh."

"Ka banpuam veilamah na nei mah ila chhuanlam siam ka duh lo. Sadam hian hnehna a chang. Madison Square Garden hi ka in pakhat ang maia ka ngaih theih vangin ka lawm a, infiamna vang hian ka chhungte hnenah thil țha tak tak ka tih theih phah." tiin a sawi.

Cotto hi Puerto Rican boxer zingah weight division palia champion thei hmasa ber a ni a, boxing khawvela hun a hman chhungin match 41-ah a chak thei a match rukah a tlawm thung a ni.