Hming thar leh neitu thar nen Force India an tlan zel dawn

24th August 2018, 10:08PM

Force India Formula One team chu an tal buai hnuah neitu thar leh hming thar nen F1 khawvelah an la tel chhunzawm zel dawn a. An hming hi Racing Point Force India tiin an thlak a, FIA pawhin an tel zel hi an phalsak tawh a ni.

Racing Point Force India te hi team thar ang an nih tak avangin July thlaa Hungarian Grand Prix an tlan thlenga an point hmuh tawhte chu thai bo leh vek a ni dawn a, tun kar tawpa Belgian Grand Prix atangin team thar hian bul an tan ang a, point engmah neih sa an nei thei dawn lo a. Season liam ta vawi hnihah khan Sahara Force India chu palina an lo ni ve ve tawh a ni.

Team driver pahnih, Sergio Perez leh Esteban Ocon te point lo hmuh tawh chu an paihsak ve dawn lo a. Team 10 awmnaah hian Force India chu round 12 hnuah parukna an ni mek a, point 59 an lo hmuh tawhte chuan paih dawn avangin a mawng lamah an awm tha leh dawn ta a ni.

Canadian billionaire Lawrence Stroll chuan Sahara Force India tlachhe tur chu a chhandam a, a lei ta daih a. Racing Point UK Limited chu Force India neitu thar an ni a, Stroll te hian team hi lei ringawt mahse intlansiak theihna chu lei tel theih a nih loh avangin a hranpain FIA hnenah an dil ve leh a, FIA hian an phalsak a ni.

FIA president Jean Todt chuan, “Inremna duhawm tak kan nei thei hi lawmawm ka ti hle a, season laihawl ni mahse lawm takin Racing Point Force India te kan lo lawm lut a. Formula One kalphung vawn that leh sum dinhmun pangngai taka awmtir hi kan tum a, FIA, Joint Administrator te, Racing Point leh Formula One Management te thawhrim zarah tun dinhmun hi kan thleng thei a ni,” a ti.

Racing Point pawhin thuchhuah an siam a, Force India COO thin Otmar Szafnauer chu an team principal thar leh CEO atan an ruat thu an tarlang a, hetih lai hian deputy team principal thin Bob Fernley chu a bang tih an tarlang bawk a. Szafnauer hian FIA leh F1 te chu an team intlansiak an la phalsak zel avangin lawmthu a hrilh nghal a ni.

Lawrence Stroll chuan, “He team in kum kha leh chen taima tak leh rim taka an lo thawh tawh dan ka hria a, chanchin duhawm tak tak an lo nei tawh a, an fakawm ka ti a. Theihtawp kan chhuah ang a, driver te tumruhna nen kum lo la kal zel turah tuna kan dinhmun aia sangah hian kan chhoh zel theih ka beisei tlat a ni,” a ti.

Copyright © inkhel.com 2024. All rights reserved.