Paul Gascoigne chuan rel chhunga mipat hmeichhiatna hawi zawnga hmeichhia a khawih nia an puhna chu a pha a, kum thar January thlaah court chuan a chungthu hi a ngaihtuah ang.

England star hlui Paul Gascoigne hi August thla khan rel hmangin York atangin Durham panin a kal a, hmeichhe pakhat chuan rel chhungah hian mipat hmeichhiatna lam hawiin a khawih niin a puh a, hei vang hian August 20 khan an man phah a ni.

Kum 51-a upa Gascoigne hi Thawhlehni khan Peterlee Magistrate Court-ah a inlan a, rel chhunga mawi lo taka hmeichhe laka che nia an puhna chu dawt a nih thu a sawi nasa hle a. A chungthu hi Teesside Crown Court ah an ngaihtuah chhunzawm dawn a, kum thar January 8 hian Gazza hi court hmaah a inlan ang.

Gazza chungchang hi thla thum chhung an chhui chiang a, chumi hnuah British Transport Police chuan thubuai pakhat an awrhtir ta a ni.

Gascoigne chuan Twitter lamah, “In hriat theuh angin thla li kalta khan mipat hmeichhiatna thila inhnamhnawihah min puh a, ka thubuai awrh thu min hriattirtu police khan selfie pui tura min sawm bakah ka autograph min la dil bawk a. Eng thil mah tih dik loh ka nei lo asin mawle,” a ti.

Twitter-ah hian Gascoigne chuan hmeichhe pakhat chu ‘bawng thau’ tia an koh avangin a rilru a na a, hnem a tum ringawt niin a tarlang a. Heng a tweet pahnihte hi a hnuah chuan a paih leh ve ve a ni.

English footballer hlui Paul Gascoigne hian 1990 FIFA World Cup-ah hming a chher chho a, a vanglaia midfielder tha bera sawi a ni a. 1988 khan a chawr chhuahna club Newcastle United chu a chhuahsan a, Tottenham Hotspur, Lazio leh Rangers ah te a khel kual a, 2004 khan football khelh a chawlhsan a ni.