Naomi Osaka chu hmeichhe infiammi zinga sum la lut hnem ber niin, sum la lut hnem zingah hian tennis player an thahnem hle.
Tun hnaia Forbes in hmeichhe infiammi sum lak luh dan an bih chiannaah hian Japanese tennis player Naomi Osaka tluk pha an awm lo a, a hnuai chiahah hian Serena Williams chu a awm a ni.
Kum khat chhunga Naomi Osaka sum lak luh zawng zawng hi Forbes chuan $37.4 million (£28.3 million) niin an tar lang a, pahnihnaa awm Serena Williams sum lak luh chu $36 million (£27.2 million) a ni.
World No. 1 Ashleigh Barty chu sum lak luh hnem lamah hian pathumna a ni a, kum khat chhunga a sum lak luh zat hi $13.1 million (£9.9 million) a ni a. A hnuai chiahah hian tennis player dang a awm a, Simona Halep chuan palina dinhmun a hauh a, a sum lak luh zat hi $10.9 million (£8.2 million) a ni.
Bianca Andreescu chuan kum khat chhungin $8.9 million (£6.7 million) a la lut a, pangana a ni a, a hnuai chiahah hian Garbine Muguruza a awm a, a sum lak luh hi $6.6 million (£5 million) a tling a ni.
Elina Svitolina chu pasarihnaah a awm a, kum khat chhungin $6.4 million (£4.8 million) a la lut a, $5.8 million (£4,4 million) laluttu Sofia Kenin chu pariatnaah a awm bawk.
Angelique Kerber chu pakuanaah a awm a, kum khat chhunga a sum lak luh zat chu $5.3 million (£4 million) niin, sawmnaah hian footballer Alex Morgan a awm a, kum khat chhungin $4.6 million (£3.5 million) a la lut a, amah chiah hi Top 10 huanga tennis player ni lo lang pha awm chhun a ni.
Khawvela infiammi zawng zawng sum lak luh tam lamah chuan Naomi Osaka hi 29-na a ni daih a, Serena Williams pawh 33-naah a awm pha chauh a ni.
Top 10
1. Naomi Osaka - Tennis : $37.4m (£26.3m)
2. Serena Williams - Tennis : $36m (£27.2m)
3. Ashleigh Barty - Tennis : $13.1m (£9.9m)
4. Simona Halep - Tennis : $10.9m (£8.2m)
5. Bianca Andreescu - Tennis : $8.9m (£6.7m)
6. Garbine Muguruza - Tennis : $6.6m (£5m)
7. Elina Svitolina - Tennis : $6.4m (£4.8m)
8. Sofia Kenin - Tennis : $5.8m (£4.4m)
9. Angelique Kerber - Tennis : $5.3m (£4m)
10. Alex Morgan - Football : $4.6m (£3.5m)