07 Aug 2019 05:21

inkhel

Hmeichhe infiammi sum la lut hnem ber Serena Williams

Serena Williams chu nikum chhunga hmeichhe infiammi zinga pawisa la lut hnem ber niin, Naomi Osaka chu pahnihna a ni.

Forbes chuan khawvela hmeichhe infiammi zinga sum la lut hnem list hi an puangzar a, tennis star Serena Williams chu a chungnung ber a, a hnuai chiahah hian US Open leh Australian Open champion Naomi Osaka chu a awm a ni.

Vawi 23 ngawt Grand Slam champion lo ni tawh Serena Williams chuan $29.2 million zet a la lut niin Forbes chuan an tarlang a, hmeichhe infiammi zinga sum la lut hnem ber nihna hi a zawnin kum li chhung chu a hauh ta a ni.

Naomi Osaka sum lak luh chu $24.3 million zet a ni a, court chhungah aiin court pawn lamah sum hi a la lut nasa a. Kum khat chuang kalta khan court pawn lamah $1.5 million vel a la lut a, nikumah erawh court pawn lamah a sum hai luh zawng zawng hi $16 million zet a tling thei tawh a. Heti chung hian Japanese nula hi Forbes Top 100 Best-Paid Athlete huangah chuan a la tel pha lo thung.

Khawvela infiammi sum hai lut hnem 100 thlan chhuah zingah hmeichhia an lang mang lo a, hmeichhe lama chungnung ber Serena Williams chiah a lang thei a, No. 63-naah daih a awm a. Pahnihna dinhmun hauhtu Naomi Osaka phei chu 100 zingah hian a lang pha lo hrim hrim a ni.

Forbes chuan he list hi inkhelh vanga pawisa an dawn te, an hlawh te, bonus an dawn te, fakna atanga an sum lai luhte atanga an siam a nih thu an tarlang a. Tun tuma mi hi June 1 2018 leh June 1 2019 inkara an sum lak luh atanga an thlan a ni.

US hmeichhe football player Alex Morgan chu tennis khel thin ni lo zinga sum la lut hnem ber niin, a sum lak luh zawng zawng chu $5.8 million a ni a, list-ah hian No. 12 a ni.

Alex Morgan hi khawvela hmeichhe football khel thin zingah chuan sum hai lut hnem ber a ni a, mipa footballer zinga sum hai lut hnem ber nen chuan an sum lak luh hi a inthlau hle a. Barcelona superstar Lionel Messi chu mipa footballer zinga sum hai lut hnem ber niin, a sum hai luh hi kum khat chhungin $127 million zet a ni a. Messi hi khawvela infiammi zinga sum la lut hnem ber a ni bawk.

Hmeichhe infiammi sum hai lut hnem zingah hian Indian shuttler PV Sindhu chu a lang pha awm chhun niin, Top 15-ah a tel a. Indian badminton player PV Sindhu hi 13-na niin, a sum hai luh zawng zawng hi $5.5 million a ni a, Top 15-ah hian 12 chu tennis player an ni.