Sebastian Vettel chuan tun season chhunga intlansiakna tur la awm zawng zawngah chak vek a tum thu sawiin, hetiang a tih theih ngat chuan a la champion theih thu a sawi.

Ferrari driver Sebastian Vettel chu Singapore Grand Prix-ah khan pathumna a ni a, khami intlansiaka pakhatna Mercedes driver Lewis Hamilton chu drivers’ championship-ah a sang fal tan tawh hle a, amah hnaih bertu Vettel ai hian point 40 ngawtin a sang tawh a. Drivers’ championship-a chungnung ber ni tur chuan intlansiak hmabak zawng zawnga a chak fai vek emaw, Hamilton a chet chhiat viau emaw a ngai dawn a ni.

Formula One season kal mekah Vettel hi vawi nga chauh pakhatna a la ni a, a chetsual avang te leh an team chetsual vel thin avangin intlansiak hnuhnung pangaah vawi 4 chu pakhatna an nih theihna an bawhpelh a ni.

Vettel hi Hamilton nen an inthlauhna sang sawt viau mahse a la beidawng duh bik lo a, amah vanga hma hruai thei lo an nih loh thu sawiin, season tawpah chuan lallukhum a la khum thei tho niin a sawi.

“Tuna kan dinhmuna kan din theihna chhan hi mi pakhat vang a ni lo a, team vang hi a ni a. Kan thil tih apiang team hian kan tiho vek a, kan chet that chuan team zara che tha kan ni a, kan chet chhiat chuan team vanga che chhia kan ni mai,” tiin Vettel chuan a sawi.

A sawi zelnaah, “Season tawp kan hnaih tial tial a, point hmuh belh teuh teuh aia kan hmuh theih tur kan hloh fo mai hi chu a ropui lo khawp mai a, mahse intlansiakna tur a la awm nual a, hengah hian kan chak vek chuan kan la champion thei a. Chutiang tih chu kan tum tlat dawn a ni,” a ti bawk.

An intlansiak lehna tur chu Sochi, Russia-ah a ni a, helai hmunah hian 2014 atanga F1 calendar-a an telh hnuah Mercedes chu a chak ber an la ni ziah a. Vettel chuan Russia-ah chauh ni loin an la tlan zelna tur zawng zawngah Ferrari chu an chungnung vek theia a rin thu a sawi a ni.