Goal thunna chang bak hrelo Borussia Dortmund striker Erling Haaland chu tunlaia goal khung thei ber zinga mi ni mahse a la induh khawp lo niin a langa, hma a sawn a la ngaih thu a sawia, tun aia a la khelh that theih thu a sawi bawk.

Haaland hian Champions League knock-out stage first leg inkhelah Dortmund chu Paris Saint-Germain lakah a chak puia, he inkhelah hian Dortmund hi 2-1 a chakin, an goal hnihte hi Haaland-a khung ve ve an ni.

Haaland hian kumin January thla ni 1 mai khan Dortmund hi Red Bull Salzburg atangin a zawma, tunah hian Dortmund tan competition hrang hrangah game 7 khel tawhin goal 11 lai a khung der tawha, a tan hmasawn ngaihna chuang awm tawh lo angin lang mahse hmasawn a la tum hle.

Haaland hian 2019/20 season kal mekah goal 37 lai a khung tawha, Champions League bikah goal 10 khung tawhin, ani anga goal khung thei hi an tam lo hle.

Kum 19 mi Norwegian striker Haaland chuan, “Man of the Match lawmman ka dawng thei hi ka lawma, mahse tun ai hian nasa takin ka la khel tha thei. Tun ang level-ah hi chuan hma ka la sawn a ngai a, tun aia ka khelh that a ngai. Tuna kan result hi a la derthawng hle a, PSG hi team tha tak an ni a, second-leg ah min la lehthal thei a ni,” a ti.