Chelsea boss Maurizio Sarri chuan pawisa hman vak vak chu hlawhtlinna bulpui a nih loh thu sawiin, hlawhtling tur chuan thawhrimna a pawimawh ber tih a sawi.

Maurizio Sarri chuan Stamford Bridge boruak thlak danglam a tumna lamah January thlaa player lei thar lampang chu a ngaihtuah loh thu a sawi a. Pawisa hmang vak kher loin an insiamtha thei a ni tih a sawi a, chutiang tur chuan tun aia thahnem ngai zawka an inpuahchah a ngaih thu a sawi.

Chelsea chuan Sarri hnuaah bul tan tha viau mahse tun hnaiah an che fuh lo chho ta nual a, Premier League game an khelh hnuhnun vawi 4 ah vawi 1 chiah chak hmel an hmu thei a, hmahruaitu Manchester City nen an inkar a zau tial tial a ni.

Sarri chuan Chelsea insiamthatna kawnga player lak thar chu a dodal bur lo tih sawiin, hmasawnna lam an ngaihtuah a ngai hle tih a sawi a. Tun aia dinhmun sang zawka awm thei tur chuan thawhrimna an mamawh hle niin a sawi a, City nen an inkar tizim thei tur chuan a hma aia rim lehzuala inbuatsaih an mamawh tih a sawi a ni.

“Tan kan lak belh zel a ngai a, thahnem ngai lehzuala kan inbuatsaih chhoh char char a pawimawh hle dawn a. Tun aia hma kan sawn zel theih hi a ngai a, chutiang tur chuan thawhrimna a pawimawh hmasa ber a, kan khel thin dan hi chiang lehzuala kan hriat a ngai a ni,” tiin Sarri chuan a sawi.

“Kan rilru put dan pawh kan thlak danglam a ngai hle mai a, a hmaa kan rilru put dan kha a tha lo tihna a ni hauh lo a, mahse a aia tha lehzual kan ngaihtuah belh zel a pawimawh a. Nakinah chuan player thar pahnih khat te chu kan duh ve maithei a, player tam tak lei kher erawh thil tul ber a ni lem lo,” a ti bawk.