Hlawh atan Manchester City an inseng hnem fal

12th April 2021, 06:04PM

Manchester City chuan hri leng karah 2019-20 chhung khan hlawh atan pawisa an hmang hnem hle a, English football chanchinah chuan season khat chhunga hlawh seng hnem record an siam hial a ni.

Season liam taah player te hlawh atana sum hman lamah record an siam zo chiah a, 2020-21 season-ah an record chu anmahni bawkin an khum hmel hle a. A hmaa season khat chhunga hlawh atana an hman £351.4 million zet mai chu season kal mekah hian an khum theih hmel hle.

Etihad Stadium-a Pep Guardiola a luh hma khan Manchester City chuan player leh staff te hlawh atan hian £197.6 million vel an hmang a. Guardiola an lak luh tirh season-ah khan hlawh atana an sum hman hi 23.4% in a sang chho nghal a, season tin a la san belh ta zel a. Tun season tawpah phei chuan hlawh atana an pawisa hman hi City a luhchilh tirha an senso let ang velah a chhoh tawh hmel a. Kum nga chhungin hlawh atan hian £1.545 billion zet an hmang tling thei dawn niin an sawi.

Kum nga chhung hian player leina atan Manchester City hian pawisa an hmang hnem viau bawk a, Pep Guardiola kaihhruaina hnuaiah player leina atan hian £2.1 billion zet an hmang tawh a, season khatah £579 million hmang zel anga chhut a ni.

Pawisa an hmang hnem tawh bawk a, lawmman lampang pawh an la ve nual tawh a. Guardiola ho hian kum li chhungin Premier League title pahnih an lak tawh bakah League Cup vawi thum, FA Cup vawi khat an la ve tawh a. Season kal mekah hian trophy pali la thei dinhmunah an la ding mek a ni.

Tuna an squad man belh khawm hi a tam tham viau mai a, khawvela football squad zingah chuan belh khawma man to ber an ni mek a. Manchester City player neih zawng zawng hlutna belh khawm hi CIES Football Observatory chuan €1.036 billion (£900 million) zet niin an chhut.

England rama football club tam tak chuan hri leng karah hlawh atana pawisa an hman chu nasa takin an ti hniam hlawm a. Manchester United pawhin 2018-19 season chhung khan hlawh atan £332 million an hmang a, 2019-20 season-ah kha chuan hlawh atana an pawisa hman hi £284 million ah an ti hniam a ni.

Manchester City erawh chuan season liam taah khan an player te hlawh chu hri leng vanga sum dinhmun a tlak hniam hnuah pawh pangngai taka pek chhunzawm tha an ti a, an ti hniam ve ta lo a. An club sum lak luh chu coronavirus vang khan 11% vel zetin tla hniam mahse player leh staff te hlawh 11% in a pun belh ta tho a, hlawh atan hian £351.4 million zet chu an hmang ta tho a ni.

Tun hnaiah Belgian midfielder Kevin De Bruyne chu contract thar an ziahpui a, kum li chhung atan contract hi ziahpuiin, kar khatah £385,000 an hlawhtir dawn a, England rama footballer zingah chuan hlawh sang ber a nih theih phah a ni.

Copyright © inkhel.com 2024. All rights reserved.