Transfer bazar tawpniah Arsenal chuan Leverkusen atangin loan-in Piero Hincapie an la lut a, Mikel Arteta a hlim hle.

Kum 23 mi defender hi Arsenal chuan tun season chhung atan loan-in an hawh ang a, nakkum nipuiah lei theihna an nei dawn a, a man hi €52million bakah sell-on clause 10 per cent a tel dawn bawk a ni.

"Piero Hincapie kan la lut thei hi ka lawm hle. Tharum ngah tak a ni a, tactic chi hrang hrangah a insiamrem thei a, kan tlarhnung tan a tangkai dawn hle a ni.

"Rilru paukhauh tak a ni a, la naupang viau mah se, a game hi a puitling em em. Kan squad nasa takin a tichak dawn a, team lian tak tak kan el theih phah dawn bawk a ni," tiin Arsenal boss Mikel Arteta chuan a sawi.

Hincapie hian Leverkusen-ah nikum December thla mai khan contract thar kum 2029 thleng daih a ziak a, Arsenal hian an lei dawn a nih chuan kum 5 daih contract Emirates Stadium-ah a ziak dawn a ni.

Hincapie hi ke veilam hmang thiam a ni a, left centre-back lamah te a khel thei a, tin, left-back lamah pawh a khel kual thei bawk.

Kum 2021 nipui lai khan Leverkusen chuan Hincapie hi Argentina club CA Talleres aṭangin an lei a, kum hnih khat chhung lekin Europe-a defender ṭha ber zingah a inhlangkai hman.

German Club tan game 166 a khel tawh a, Ecuador tan game 46 a khel tawh bawk. Tun season-ah Hincapie hi Leverkusen tan game hnih a inlan leh tawh a ni.