21 Sep 2018 04:47

inkhel

Hima Das tan Adidas

Asian Games 2018 a India tihmingthatu Hima Das chu German company lian chuan a hming chuanna pheikhawk an siamsak ta a. Hima Das hming chuanna pheikhawk hi a bik taka siam niin, kezungtang 12 nei chunga bun tura a hranpaa an duan a ni.

Hima Das hi Assam chhunga thingtlang khaw te ve tak pakhat Dhing ah a khawsa a, a pian pangngai lohna avang leh sum lama an pachhiat bawk avang te pawhin pheikhawk a bun tam lo hle a. Phaizawlah te, kawng chhe em emah te leh chirhdiakah te kelawngin a tlan nasa thin hle a, tunah chuan khawvela company langsar ber pawl nen an inzawm der tawh a ni.

German pheikhawk company lian Adidas hian Hima Das pheikhawk an siamah hian a dinglamah a hming hi an tarlang a, veilamah chuan ‘create history’ tih an tarlang bawk a ni.

Kum 18-a upa ‘Dhing Express’ an tih mai, ‘Golden Girl’ ti pawha an sawi thin Hima Das hi khawvel huapa India aiawha athletics lama gold medal la hmasa ber a ni a, Finland rama IAAF World Under-20 Championships ah women’s 400m gold medal a la a, hetiang ti thei hmasa ber hi a ni a. Indonesia rama Asian Games-ah khan Women’s 4x400m a gold medal a lak bakah mixed 4x400m leh 400m individual-ah te silver medal a la a ni.

Hima Das chuan, “Adidas chhungkuaa ka tel ve thei hi lawmawm ka ti tak zet a, khawvel pumpuia infiammi ropui tak takte huanga min teltir hi ropui ka ti a. An zarah hian tuna ka thlen phak chin aia sang hi ka thlen belh zel theih ka beisei a, India ram tan pawh hmasawnna kawng a nih theih ngei ka ring tlat a ni,” a ti.

Adidas hi India ram infiammi thenkhat - Rohit Sharma, Rishabh Pant, Dipika Pallikal, Kuldeep Yadav, Zeel Desai, Nikhat Zareen bakah khawvel hmun hrang hranga infiammi lar rual - Naomi Osaka, Lionel Messi, Paul Pogba leh Caroline Wozniacki te nen an lo inzawm tawh a ni.