10 Feb 2019 03:47

inkhel

​Higuain-a’n Sarri a ring tawk

Chelsea-in thlasik bazar hun laia Juventus atanga an lakluh Argentine striker Gonzalo Higuain chuan Chelsea-a a pu Maurizio Sarri chu a ringtawk hle a, a thatna lai ber phawrhchhuahsak theitu manager a nih thu a sawi.

Sarri leh Higuain-te hi Napoli lamah kum 2015-16 season khan an lo inhrawn tawh a, hemi tum hian Higuain hian goal 38 lai a khung. Chelsea tana a Premier League hnihnaah Higuain hian goal mawi tak tak pahnih a khung nghal bawka, beisei a sang hle.

Higuain chuan, “Sarri hian ka thatna lai ber a lo phawrhchhuak tawh a, amah hi ka hre chianga, amah pawhin min hrechiang. A hma anga hlawhtling khan kan thawhdun leh theih ka beisei a, chu chu kan tum dan pawh a ni. Ka khelhdan a hria a, chuvang chuan ka thatna lai ber phawrhchhuah dan a hria.

“Chelsea ka zawm thei hi ka lawm hle a, club nuam tak a ni a, stadium pawh an nei nuam hle. Hun lo awm zel turah he team hi an hlawhtlin zel ka beiseipui a ni,”a ti.

Higuain hian season chawhma lam kha AC Milan-ah loan-in a khel a, thalsik bazar hunlaiin Chelsea-in an dawr tak avangin Milan-a a loan hi pawt tawiin London lamah a insuan. Milan-ah hian beisei a pha lo angreng hle a, game 22 khel hmanin goal 8 a khung.

Serie A lamah beisei a pha lo chho nen, kum 30 a lo chhuang tawh bawk nen mi tam takin Chelsea-ah a hlawhtlin an ring lova, Premier League-ah a insiamrem theih mai an beisei lo. Mahse Higuain erawh chuan a hma aia a tlakhniamna a awm loh thu leh theihtawp a chhuah tur thu a sawi ve thung.

Chelsea no.9 chuan, “Engtik lai pawha theihtawp chhuaha hmasawn reng duh mi ka ni a, Napoli zawh khan Juventus ka pan a, league title vawi hnih ka chawi bakah league cup ka chawi a, Champion League final kan thleng bawk.

“Milan-ah khan hun harsa ka paltlang tih chu zep rual a ni lova,mahse a hma aiin ka tla hniam ta tihna a ni lo. Napoli-ah hlawhtling em emin hun ka hman zawh kha chuan khatiang khum kha chu harsa tak a ni tawh. Mahse kawng engkimah hma ka sawn mek zela, thla ruk chhung hun khirh angreng tak ka tawn hnuah tun hma angin Maurizio Sarri leh Chelsea-te bulah hian hlawhtlin leh ka inbeisei.

“Italy-a kum ruk hun ka hman chhung khan ka hlawhtling thawkhat viauin ka inhria a, England-a insawnna hun remchang ka neih kha chuan bawhpelh chi ah ka ngai lo. Team ropui tak Chelsea angah Maurizio zawm leh theihna hun tha ka nei kha chuan ka inngaihtuah buai chhin eih lo. He hmunah ka lut hi ka inchhuang a, ka theih anga thaa ka khelh theih ngei ka beisei a ni,” a ti.