23 May 2020 05:24

inkhel

Higuain-a’n River Plate-a hun tawp hman a rilruk

Gonzalo Higuain chuan Juventus chhuahsanin River Plate lam pan a, a chawr chhuahna club-ah a hun tawp hman a rilruk thu a sawi.

Tun hnaiah Gonzalo Higuain chu Serie A champion Juventus chhuahsan tur angin an sawi mek a, Argentina ram lama kir leh tur anga sawi a awm bawk a. A chawr chhuahna club River Plate nen an sawi zawm bakah Major League Soccer club te nen pawh an sawi zawm bawk a ni.

Kum 32-a upa Higuain hi 2005 kumah khan River Plate youth system atangin a inlar chhuak ve tan a, La Liga club lian Real Madrid chu 2007 kumah a zawm a, hemi hnuah hian Europe khawmualpuiah chanchin duhawm tak tak a nei chho ta nual a ni.

Argentina rama club lar ve tak River Plate tan khan Higuain chuan game 41 khelhah goal 14 chu a thun hman a, hetih rual hian first team lama a khelh laiin trophy erawh a lakpui hman lo thung.

Higuain hian Europe khawmualpui a pan hnuah hlawhtlinna hmel a hmu ve ta nual a, Real Madrid chu La Liga title vawi thum a lakpui bakah Juventus chu Scudetto vawi hnih a lakpui bawk a. Chelsea pawh Europa League title a lakpui hman a, club hrang hrangah trophy 13 zet chu a la tawh a ni.

An ram Argentina tan vawi 75 chu Higuain hi a feh chhuak ve tawh a, hengah hian goal 35 chu a thun tling hman bawk a. An ram a chet thatpui ber tum chu 2014 FIFA World Cup-ah pahnihna a nihpui bakah 2015 Copa America leh 2016 Copa America ah te pahnihna a nihpui bawk a ni.

“River Plate hi ka tan chuan club pawimawh tak mai an ni a, engkim min petu an ni a. Min hrual mum a, Real Madrid pan thei khawpin min chher chhuak a. Tunah chuan engtin nge ka awm zel dawn ka sawi thei rih lo a, Turin khawpuiah hun ka hmang mek a ni,” tiin Higuain chuan a sawi.

“Juventus ka chhuahsan ta a nih chuan River Plate-ah hian kir leh ka chak a, inkhel ka chawlhsan hma chu an hnena awm a chakawm khawp mai,” a ti bawk.

Coronavirus vanga inkhel tihtawp lailawk a nih hma khan Higuain chuan Serie A lamah Juventus aiawhin vawi 23 a inlan hman a, hengah hian goal 5 chu a thun a. 2019-20 chhungin Maurizio Sarri kaihhruaina hnuaiah Higuain hian inelna hrang hrangah goal 8 chu a thun hman a ni.