08 Sep 2015 01:08

PC Lala

inkhel correspondent and photographer

​Hexa League Season 1 zan 4-na thlirlawkna

Mizoram Table Tennis khawvela inelna sangber leh sum chevel tamna ber Oil India Mizoram Hexa League Season-1 zan 4-na chu september 8, 2014 zan dar 6 atangin a hmun ngai MTT Hall, Kawltheihuanah khelh chhunzawm a ni leh dawn.

Match hmasa zawkah veng inthenawm Mission Veng La Paloma leh Mission Vengthlang TT Club ten an veng inthenawmna dahtha in an in nuai ang. Match hnuhnung zawkah hian The Smashers, Vaivakawn leh fans nei tha Ramhlun Sporting Club te an in hmachhawn leh ang. Inkhel hi a hmun a kal remchang ve theilo tan Zonet Rihnim channel-ah live a pekchhuah a ni.

Mission Veng Derby

Zoram Table Tennis khawvela veng hlun leh lian pahnih Mission Veng La Paloma leh Mission Vengthlang TT Club te hian MHL-ah bul an tan that loh avangin zanin hian chak ngei tumin an inpuahchah dawn. Team inhrechiang tawn an nih avangin engtin tak in set ang maw? An match vawi hnih neih tawh a la vanduai ve ve Mission Vengthlang hian an star player Lalmalsawma thlawp tur hian tu tak rawn chhawp chhuak ang maw.

Singles game la khel lo tawnhriat neitha Liansanga an rawn luh tir ve tawh angem, doubles ah hian vawi 2 an chak tawh loh avangin doubles-ah hian hmelthar an rawn inkawp tir dawn nge a ngai an la ring ngam ang. Mission Veng La Paloma te hi an match hmasa berah uihawm takin Bungkawn lakah an tlawm tawh a, kha match a an tihsual te kha tihsual nawn leh an tum tawh hauh lo ang le. An player innghahna Ruata Ralte, Henry Laltanpuia te hian a hun takah an thatna an rawn lantir thei angem, an team setting te hi an rawn thlak danglam dawn nge a tir ami ang kha an la rawn dinchhuahpui leh dawn. Heng zawhna tamtak hi zaninah chhanin a awm ang.

The Smashers, Vaivakawn leh Ramhlun Sporting Club

Zanin match hnuhnung zawkah hian vawikhat khelh tawh a chak record nei The Smashers, Vaivakawn leh la chak ve lo Ramhlun Sporting Club te an in hmachhawn ve leh ang. Vaivakawn lam hian an match hmasa bera an chak avangin inrintawkna nen RSC hi an rawn hmachhawn dawn a, karhmasa lama an chakpui an team setting kha an rawn hmang nawn leh angem, an doubles partnership tha tak kha an thlauhthla dawn nge, a aia tha rawn chhawpchhuah tur an nei, Chhanhima nge chopper Ruatpuia’n an team no 1 hmun rawn luah ang.

Tawnhriat neitha Ruattea hi Doubles leh singles no 3 dinhmun an rawn luahtir leh dawn em. Ramhlun lam hian an innghahna Men’s Singles no 1 Isaac-a thlawp turin tu tak rawn chhawpchhuak ang maw. Doubles pair ngai nge a thar an rawn enchhin dawn, match hmasa lama an vanduai tawhna hian an inrintawkna an hlauh phah angem? Singles khel turin player thar rawn chhawpchhuah tur an nei em, an squad hi a chhah tawk reng em. An fans ten an tawiawm that thin avangin an fans te hi chakpui nan an hmang zo angem. A hmunah entu mipui an pun zel avangin game boruak sang, mipui huhang zo zawk zawk team te hi che tha tura rin an ni bawk

picture credit : Mizoram Table Tennis Association

(adsbygoogle = window.adsbygoogle || []).push({});