10 Jan 2019 01:37

inkhel

​Herrera leh United an inbe mek

Manchester United midfielder Ander Herrera chu tun season zawh rual hian a contract neih lai a zo ve dawn a, contract thar a la ziah loh avangin kumin January ni khat atang khan tu tan pawh biak theih a ni tawh.

Tu tan pawh biak theih niin, pre contract hial pawh ziak thei ni tawh mahse Herrera hi United lam nen contract thar chungchangah an la inbe mek niin Sky Sports chuan a tarlang.

Contract thar a ziah lova tun nipuia free-agent ni mai tur Herrera hi a club hlui Athletic Bilbao chuan an duh let thu an lo sawi lang tawha, mahse United nen an inbiak mek avangin Herrera hi Bilbao nen inremna an la nei lo.

Interim manager Ole Gunnar Solskjaer-a hnuaiah a khel rim in a khel tha bawk nen Herrera hian United a la chhuahsan duh lo niin a langa, contract thar chungchangah Herrera leh United lam hi an inrem thuai pawh a rinawm hle.

Herrera hi Real Zaragoza chhuak a ni a, kum 2011 khan Athletic Bilbao panin, kum 2014 khan United a pan leh a, United hian kum 29 mi manah hian a release clause an pe tla a ni.

United tan Spaniard midfielder hian game 177 a khel tawh a, goal 19 a khung tawh. Herrera laklet duhtu Bilbao hi tun season-ah an che tha lo hle a, La Liga table-ah 17-naah awm mekin, relegation zone atangin point hnih chiahin an la him a ni.