Hero I League 2nd Division League final round khelh mekah May ni 15, Nilaini chawhnu dar 2:30 khan Rajiv Gandhi Stadium Mualpuiah Mizo Club Chhinga Veng chuan sikhat faiin mikhual Bengaluru club Ozone FC an hneh. Goal awm chhun hi second half-a lut a ni a, penalty atangin MS Dawngliana chuan a khung a ni.

Final round-ah hian Chhinga Veng hian Manipur club Trau FC anhneh loh hnuah Ozone Football Club an hneh a, Lonestar Kashmir FC nen chak zawk awmlo a an inhneh tawk hnuah Ozone FC an hneh leh a, match 4 khel tawhin point 7 an nei mek a, table-ah pahnihna an ni mek a ni. May ni 18, Inrinni chawhnu dar 2:30-ah Rajiv Gandhi Stadium, Mualpuiah Lonestar Kashmir FC nen an inkhel leh ang.

02:30 PM Chhinga Veng 1-0 Ozone FC

(MS Dawngliana 48' (P)

Chhinga Veng FC XI: Lalliansanga, Thasiama, Maibam Jimmy Singh, Lalromawia, Hmingthanmawia, Zothanmawia, Vanlalbiaa Chhangte, Lalmuanawma, MC Malsawmzuala, Vanlalzuidika, MS Dawngliana.

Ozone FC XI: Dharminder Guru, Chika Wali, Keith Raymond Stephen, Prabin Subba, Harpreet Rulbir, Manoj Swamy Kannan, Vignesh Gunashekar, Sukhandeep Singh, Shamanth Dodda, Ravindra Kumar, Sabeeth Sathyan.

Team pahnih te an intluk tawk hle a, goal hlauhawm hmuh tur erawh a tam lo thung. Inkhel tan a ni a, Chhinga Veng chuan nawr nghalin forward MS Dawngliana chuan box pawn chiah atangin goal a khung nghal teuh hle. Ozone FC pawhin goal thunna hun tha nei ve bawkin midfielder Prabin Subba shot tha zet chu Chhinga Veng keeper T. Mawia chuan a dan sak.

First hlaf huntawp dawnah Chhinga Veng chuan goal thunna hun tha an nei leh a, box chhungah forward Lalliansanga (Notea) ball pek tha zet chu Vanlalbiaa Chhangte chuan chuan goal-ah a chantir ngei dawn nia alan laiin ozone FC keeper Dharminder Guru chuan a dan sak a, goal lut lo in hun chanve an hmang zo.

Second half tan a ni a, minute 3 aral hmain Vanlalbiaa Chhangte penalty hlawh chhuah chu MS Dawngliana chuan goal-ah chantirin an hmahruaina a khung. Ozone FC chuan an siphurh chu sut ngei tumin an nawr let a, midfielder Prabin Subba chuan a hun tha neih a hmang tangkai thei lo a, huntawp dawnah forward Sabeeth Sathyan chuan vawihnih an siphurh sutna hun tha a hloh zui bawk.

Chhinga Veng pawhin goal thun belhna hun tha neiin Lalliansanga (Notea) chuan a hun tha neih a hmang tangkai thei bik lo a, goal dang luh belh lo in Chhinga Veng chuan 1-0 in hnehna an chang zui ta a ni.