Bayer Leverkusen tana goal khung thei tak Mexican striker Javier Hernandez chuan Manchester United tana a chetthat tawk loh chhan chu bench lama hun a hman tam vang niin a sawi.
Man Utd-a a cham chhung khan 'super sub' tia sawi thin a ni a. Nipui liamta khan Bundesliga club Bayer Leverkusen a zawm ta a. A club thar tan season chawhma chhungin competition hrang hrangah goal 19 a khung tling der tawh.
Tin, Leverkusen tan hian Hernandez hian league match 12-ah starting XI a chang a, Red Devils-a a khelh lai 2011-12 season ai khan Leverkusen-a season chawhma chiah a khelh chhung hian a start hnem zawk a. Bundesliga History-ah Debut season-a; season chawhmaa player che tha ber a ni thei hial a ni.
Hernandez chuan,"Season hnih emaw thum emaw liamta khan ka khel tamlo hle, bench atangin ka lut a, lakchhuah ka ni reng bawk a. Tunah erawh ka club tan game tin ka khel chho ve ta.
"Hei hi ka mamawh tak chu a ni. Goal kan khung hian mi chuan inrintawkna nei turah min ngai a, kei chuan ka khelh tamin inrintawkna ka nei zawk a ni." tiin Oralando Sentinel a hrilh.
Bundesliga chuan thlasik chawlh an hmang mek a, January thla tawp hian season chawhnu lam an tan leh dawn a, Bayer Leverkusen hian Hoffenheim an hmachhawn dawn a ni.