​Henry lehpelh ka tum- Lukaku

19th October 2018, 01:10PM

Manchester United striker Romelu Lukaku chuan Arsenal striker hlui Thierry Henry aia Premier League goal thun hnem zawk a tum thu a sawi.

Lukaku hian tunah hian Chelsea striker hlui Didier Drogba chu lehpelhin goal 105 a thun tawh a, Drogba aiin goal khatin a thun hnem tawh. Kum 25 mi chauh a la ni a, a dam that phawt chuan a thun belh ngei dawn tih a chiang a, Henry hi a la lehpel lovang tih a sawi theih loh.

Lukaku leh Drogba-te hi Chelsea-ah an awm dun hman a, an inhre tha a, tun thlengin an la inbe pawp nghe nghe. A goal khung zat a khum chungchangah Drogba chuan a lawmpui thu sawiin Lukaku chuan, “Drogba goal khung zat ka lehpelh khan Snapchat-ah a Premier League title lak tawh pali thlalak min rawn thawn a, min lawmpui thu min hrilh bawk. Nitinin kan inbia a, kawm a nuam a, min puitute zinga mi a ni.”

“Tunah chuan Thierry Henry nen kan inbia a, a goal khung zat ka khum tur thu chu nui chungin ka sawi uang thin a, mahse a ruk chuan ka ti tak tak a ni tih a hria ang,” a ti.

Henry hian Premier League-ah goal 175 lai a khung a, Lukaku hian goal 105 a khung tawh. Sawi tawh angin Lukaku hi kum 25 mi chauh a la ni a, a la thatbelh zel tura ngaih a ni bawk nen, inhliamin a tlakbuak a nih loh chuan Henry hi a khum lovang tih sawi theih a ni lo. Kum 2017 kha Lukaku hian Manchester United hi zawmin, United tan game vawi 62 inlan tawhin, goal 31 a thun tawh. A goal 31 thun tawh zinga 20-te hi Premier League-a a thun an ni nghe nghe a, assist vawi kua a nei tawh bawk.

United hian Lukaku manah hian pound maktaduai 75 bawr vel an seng a, United tana a game hmasa ber pangaah Lukaku hian goal nga a khung thei. Tun inrinni hian United chu Stamford Bridge-ah lenglutin Chelsea an hmachhawn dawn a, Lukaku pawh hi a team hlui laka inlan ngei tura beisei a ni.

Copyright © inkhel.com 2024. All rights reserved.