Monaco midfielder Aleksandr Golovin chuan an manager kal chhuak ta Thierry Henry chu a ang nasa thin hle niin a sawi a, a chang chuan Henry chu a tihtauh thin thu a sawi bawk.

Monaco hi tun season-ah an chet chhiat em avangin an manager Leonardo Jardim an ban a, Henry chu season laklawhah lalutin ni 104 chiah Henry hian Monaco a enkawl hmana, ban a ni ve leh nghal. Monaco hian Henry an ban hnu hian Henry an ban hma chiaha an ban Jardim bawk an lalut leh a, tunah erawh a hma ang em emin an che chhe tawh lo.

Golovin chuan Henry chungchang sawiin, “Henry khan amahah footballer a nihna kha a la theihnghilh lo niin a langa, a duhdana thil a kal lohin a ang nasa thin hle. A tul pawh a ni mahna. Player tha tak a ni thin tih kan hria a, Monaco-ah amah han pha thei ve deuh chu Radamel Falcoa leh Cesc Fabregas-te chiah hi an ni.

“Khelmualah a rawn lut anga, a vin anga, tihdan tur amah ngeiin min kawhhmuh thin. Manager dang chuan insangmar turin min fuih mai a rinawm a, mahse Henry erawh a vin nghal hlur a, khelhmual chhungah amah a tlan lut ve nghal bawrh bawrh thin a ni ber mai.

“Vin takin ‘ball hi min chhuhsak tum rawh u’ a ti thin a, player-te erawh kan phawkhlek ngai lem lova, mak erawh kan ti thin. Manager ni turin a la inpeih lo niin a lang ber. A chang chuan a rilru a na ang a, min biak duh loh changte hial a nei thin. Jardim rawn kir hnuah erawh boruak a zangin a nuam leh tan a ni.

“Head coach nih chuan engkim mahni kova a tlak tawh avangin assistant manager ang ngawt a ni lo va, Henry khan player naupang te lakah rinna nasa takin a nghata, youth team ami player parukte kan bula training zawm turin a ko hial a ni,” a ti.