Sunday zan Premier League inkhelah Manchester City striker Sergio Aguero chuan Premier League-a record ding lai pahnih ngawt a break a, English mi nilo Premier League-a goal khung hnem ber thar a nih bakah Premier League-a hattrick siam hnem ber a ni bawk.

Aguero hian Arsenal striker hlui Thierry Henry lehpelin English mi nilo Premier League-a goal khung hnem ber a ni ta a, Henry hian goal 175 a khung laiin Aguero hian goal 177 lai a khung tawha, goal khung tam lamah Chelsea midfielder hlui Frank Lampard nen an inang chiah.

Aguero hian Aston Villa lakah hattrick siamin hei hi Premier League-a hattrick vawi 12 a siamna a ni a, Premier League-a goal khung hnem ber Alan Shearer chuan Premier League-ah hattrick vawi 11 a siama, hei hi Aguero chuan a lehpel bawk.

Aguero hian Lampard-a goal khung zat a nih rual pui meka, a khum chhoh ngei pawh a rinawma, Lampard a khum chuan Premier League-a goal khung tam lamah mi pathum bak a chungah awm tawh dawn lovin, Andy Cole (187) , Wayne Rooney (208) leh Shearer (260) te chiah an awm tawh dawn.

Kum 31 mi Aguero hian City-ah kum 2021 thleng contract a la nei bawk nen Rooney-a goal khung zat 208 thleng hian a khum chhoh theih a rinawm hle a, mahse Premier League-a goal 260 khung thei Shearer-a record erawh a khum theih a rinawm loh.

Aguero lo lan hma zawng chuan Arsenal striker thin Henry chu Premier League-a English mi nilo zinga ropui ber anga ngaih thin a ni a, mahse Aguero lo lan takah chuan Henry aiin Aguero hi dah ropui zawk tu an awm chho mek. Aguero hian goal 177 khung turin game 255 a mamawha, Henry hian goal 175 khung turin game 258 a mamawh thunga, Aguero hian khel tlem zawkin goal a khung tam zawk.

Henry hian Arsenal tan Premier League nomawi pahnih a chawi hmana, Aguero hi chuan Manchester City tan Premier League title pali ngawt a la tawh thunga, a la lak belh lovang tih a sawi theih loh bawk. Henry hian Premier League Golden Boot chu vawi li ngawt a dawnga, Aguero hi chuan vawi khat chiah a la dawng thunga, Henry hi Premier League Player of the Season atan vawi vawi hnih thlan a nih tawh laiin Aguero erawh hian he chawimawina hi a la dawng ve lo.

He inhnialna hi a tawp mai dawn lova, a bikin kan club tan a zirin kan dah ropui zawk a inang lo dawn tih chu thil chiang a ni. Aguero hian goal a khung hnem zawk bakah team angin trophy a chawi hnem zawka, mahse Henry erawh hi chuan mimal chawimawina a dawng hnem zawk. Premier League bikah chuan Aguero hi Henry aiin a ropui loh bikna a awm tawh hauh lova, a retire hunah ngat phei chuan tun ai hian dah ropui a la ni zawk ngei dawn a ni.