Liverpool captain Jordan Henderson chuan Jude Bellingham an lak luh theih chuan thil ropui tak  a ni dawn niin a sawi. 

Kum 20 pawh a tlin hmain khawvela player heltu ngah ber pawl a rawn ni chho a, club leh ram tan vawi 200 a khel tling tawh. Kumin nipuiah emaw, nakkum nipuiah emaw Borussia Dortmund a chhuahsan rin a ni. 

Liverpool, Real Madrid leh Manchester City chu heltu club langsar pawl an ni a,  Manchester United, Chelsea leh Paris Saint-Germain pawhin an ngaihven hle. 

Henderson nena an inkar a that chhoh viau avangin team dang aiin Liverpool a thlang maithei.

"A pan lam tur hi a chhungte nen an sawi ho dawn tih ka chiang. Eng kawng pawh zawhin eng club pawh thlang se, a pan club chu club vannei tak an ni ang. A theihna hi a sang a, a duh chen chen a thleng thei ang.

"A rilru put hmang hi a dik a, chu chu a pawimawh ber. A la naupan tehreng nen a rilru put hmang hi awih a har zawk. Hun lo la awm zel turah hian player tha tak a ni dawn tih ka chiang.

"England kawr a hak apiang hian a tha zual tulh tulh. Hmasawnna turte chu la nei ve tho mah se a duh chen chen thleng thei tur a ni. 

"Player tha ber ni turin ka duh a, Liverpool a rawn pan chuan a ropui ngawt ang. Mahse ama tana club tha ber a pan a ngai. Club zawng zawng hi chuan an duh vek ang,"tiin Henderson chuan a sawi.

Dortmund chuan Bellingham-a chhanna hi an nghak mek a, a la inngaihtuah ve mek. Tun thlengin a pan lam tur hriat a la ni lo. Bundesliga lam nen hian kar thar lamah inbiakna an nei dawn niin media te chuan an tarlang.

Real Madrid, Liverpool leh Manchester City te chuan England camp-a a awm laiin Bellingham hi an be pawp tawh a, an plan pawh an sawi ho pui hlawm tawh. An lam pan turin an it em em theuh a ni.

Dortmund lam pawhin ruahmanna an nei ve tho a, kum 2025 thleng contract nei mah se contract thar sign pui an tum der tawh. An hnena kum 1 dang cham a la remti a ni chuan an club-a player hlawh hnem ber nihtir an tum. A chhuak a nih erawh chuan Dortmund player man to ber a ni ngei bawk dawn a ni.