Liverpool captain Jordan Henderson leh Chelsea midfielder N’Golo Kante te chu an inhliam avangin an chawlh rih a ngai dawna, thla khat dawn ve ve an chawl dawn niin a lang.

Liverpool midfielder Henderson hi tunkar Champions League inkhelah Liverpool in Atletico Madrid an tlawh tum khan hun tawp hnaih lamah hamstring injury a nei a, Liverpool manager Jurgen Klopp chuan English midfielder hi a inhliam na lutuk lo tih a sawi rualin kar thum vel a chawlh a ngaih tur thu a sawi tela, a inhliam rei lo chu an vannei tih Klopp hian a sawi tel bawk.

Klopp chuan, “Henderson hi a aia naa inhliam thei a ni a, hamstring lam niin, Premier League-ah hian hamstring injury hrang hrangah kan lo hmu tawha, Harry Kane pawh kha a ni. Henderson-a hliam hi na lutuk ni lo mahse kar thum vel chu a chawlh a ngaih hmela, thil lawmawm lam chu ni hauh lo mahse kan vannei hle in ka hria.

“Hendo tih loh chu ka player-te an fit veka, chuvang chuan West Ham kan tum turah hian duh duh ka thlak danglam thei. Mahse thil thlak danglam a ngai kher lova, hahchawlhna hun kan ngaha, thil ka thlak kual a nih pawhin Atletico game vang kha a ni lovang,” a ti.

Chelsea manager Frank Lampard chuan an midfielder Kante pawh hi inhliam avangin kar thum a chawlh tur thu a sawi ve bawka, tunkar tira Chelsea leh Manchester United inhmachhawn tum khan Kante hi a inhliam avangin lak chhuah a ni.

Lampard chuan, “N’Golo hi a fit lova, a tha lamah na a nei a, Arsenal laka a neih ang deuh chiah kha a ni. Kar thum hnuah chuan a khelh leh theih tawh ngei kan beisei a ni,” a ti.