31 Oct 2019 07:23

inkhel

Heavyweight champion upa ber nih chak Wladimir Klitschko

Wladimir Klitschko chuan boxing khawvela let leh a duh thu sawiin heavyweight champion upa ber nih a duh thu a sawi.

A duhthusam ang thleng thei tur chuan WBA, WBO leh IBF heavyweight world champion hlui Wladimir Klitschko hian kum hnih a la nghah a ngai dawn a. 1994 kumah khan khatih laia kum 45-a upa, vawi hnih champion lo ni tawh George Foreman chuan world title a la thei a ni.

Klitschko hian 2017 kumah Anthony Joshua a hneh lo a, kum 43 mi niin inhnek chu a chawlhsan zui a. Tun hnaiah inhnek lampang chu buaipui leh a chak thu sawiin, boxing a luhchilh leh duh chhan ber chu world heavyweight champion upa ber nih theih a duh vang a nih thu hi a sawi chhuak.

Ukranian boxer Klitschko chuan, “Ka la tla chhe bik lo a, ka la inhnek thei reng a. Tunah tak chuan engmah thutlukna ka la siam lo a, kawng hrang hrang atangin ka la thlir kual vel mek a ni,” a ti.

“Boxing khawvelah ka kir leh a nih dawn chuan mi khabe ruh hnek tliah lampang ngawr ngawr a ni dawn lo a, record thar siam tur zawkin a ni ang a. Hetianga tih theih hi ka duh tak tak a, ngaihtuahna tha tak niin ka hria,” a ti bawk.

A sawi zelnaah, “George Foreman pawh khan kum upat tawh lamah title a la thei a, champion a nih leh khan kum 45-a upa a ni tawh a. Khatiang kha kei pawhin ka tih theih lohna tur ka hre bik lo a, a record kha khum theih ka chak hle a ni,” a ti.