Tyson Fury chu Ring Magazine chuan khawvela heavyweight boxer tha berah an thlang.
Kumin February thlaah khan Tyson Fury chuan American boxer Deontay Wilder chu a knockout a, WBC title kawlin, Ring Magazine chuan heavyweight huangah Fury aia tha an awm lo tih ngaihdan an nei a ni.
‘Gypsy King’ hi mi tam takin heavyweight boxer tha ber tia an sawi Anthony Joshua nen la inhnek tura ruahman niin, 2021 chhungin British boxer ropui pahnihte hi boxing ring chhunga inhmachhawn tura ngaih an ni a, nghahlelh a hlawh hle.
Ring Magazine in tuna ranking an siam tharah hian a hmaa hmahruaitu Anthony Joshua chu pahnihnaah a tla a, 2019 chhung khan hneh loh nei loa a kal tluang lai a tawp avangin pahnihna hi a nih phah a, pakhatnaah Tyson Fury hi a awm ta thung a ni.
June 2019 ah khan Watford khaw chhuak Anthony Joshua hian Andy Ruiz Jr a hneh lo a, nikum December thlaah a chak leh avangin WBA (Super), IBF, WBO leh IBO title te chu a kawl leh vek a ni.
Anthony Joshua hnuaiah hian Dillian Whyte a awm a, a chungnung pathum chu British boxer vek an ni a. 2019 chhung khan Dillian Whyte hian Oscar Rivas leh Mariusz Wach te a hneh a, kumin August thla chhung hian Russian boxer Alexander Povetkin nena inhnek tura ruahman an ni a, a hmaa pathumnaa awm Deontay Wilder chu palinaah a tla thla a ni.
Deontay Wilder chu kumin December thla chhungin Tyson Fury nen inhnek leh tura ruahman chhin a ni a, an inhnek leh a nih chuan ranking pawh a danglam leh theih a rinawm.
Cuban boxer Luis Ortiz chuan nikum November thlaah khan American boxer Deontay Wilder a hneh lo a, ranking thar berah hian panganaah a awm a, a hnuai chiahah hian Russian boxer Alexander Povetkin a awm bawk a ni.
New Zealand boxer Joseph Parker chu pasarihna a ni a, pariatnaah hian American boxer Michael Hunter a awm a. Colombian boxer Oscar Rivas chu pakuana niin, Bulgarian boxer Kubrat Pulev chu sawmnaah a awm bawk a ni.
Ring Magazine Top 10 Heavyweight Boxers:
1. Tyson Fury (Great Britain) 30-0-1
2. Anthony Joshua (Great Britain) 23-1-0
3. Dillian Whyte (Great Britain) 27-1-0
4. Deontay Wilder (United States) 42-1-1
5. Luis Ortiz (Cuba) 31-2-0
6. Alexander Povetkin (Russia) 35-2-1
7. Joseph Parker (New Zealand) 27-2-0
8. Michael Hunter (United States) 18-1-1
9. Oscar Rivas (Colombia) 26-1-0
10. Kubrat Pulev (Bulgaria) 28-1-0