19 Nov 2018 04:52

inkhel

Heat lakah LeBron James-a’n point 51

LeBron James chuan point 51 ngawt mai a score a, LA Lakers chuan Miami Heat chu 113-97 in an hneh theih phah a. James hian tun season chhunga a thun hnem ber a la nih bakah a team hlui laka a la thun tam ber a ni bawk.

LA Lakers leh Miami Heat te inkhelah hian first quarter chhung ringawtin LeBron James chuan point 19 a thun hman a, Lakers chuan point 21 velin hma an hruai bawk a, a umtu an ni miah lo a ni.

James hian tun season-ah point 51 hi a la thun tling lo a, Miami laka a thun hnem ber a la ni bawk a. Heat lakah hian a hmain vawi hnih chu point 47 a lo thun tawh a, chu chu a thun hnem ber niin, a hmaa a record chu a khum thei ta a ni.

2014 NBA Finals hnuah LeBron James hian Miami Heat chu a chhuahsan a, Heat a chhuahsan hnuah an lakah a la tlawm zel a, tun hi a vawi khat chakna chiah a ni.

Wayne Ellington chuan Miami tan point 19 a score a, anni hi an court-ah a zawnin vawi 4 an tlawm ta a, kum 12 chhunga bul an tan chhiat ber dawttu a la ni a. 2016-17 season tun ang hunah khan kumin aiin an lo che chhe tawh zawk a ni.

Josh Richardson chuan point 17 a score a, fourth quarter-ah a trainer pakhat chu mipui lama a vawm chhoh vak avangin an eject a. Josh hian foul ni ngeia a hriat anmahni tan an ham loh avangin a thinrim a, hetiang hian a che ta a. Tyler Johnson chuan point 17 a thun a, Rodney McGruder pawhin point 14 a thun bawk.

Goran Dragic chu a khup fel loh avangin a tel thei lo a, Dwayne Wade pawh a nupui Gabrielle Union-Wade nen an fanu thar piang vangin a zawnin game 7 a tel lohna a ni ta a. Tun kar tawpah hian Wade hi a kir leh tawh an beisei.