Miami Heat chuan Milwaukee Bucks chu 115-100 in an hneh a, top seed Bucks hi NBA playoff atangin an nek chhuak tep tawh.

Jimmy Butler chuan he inkhelah hian Heat tan point 30 a score a, fourth quarter ringawtah point 17 zet chu a thun a. Fourth quarter-ah hian Miami hi an che tha viau mai a, point 40 zet an thun a, Bucks chuan fourth quarter bikah hian point 13 chiah an thun thei a ni.

Eastern Conference semi final series an khelh mekah hian vawi thum an inkhel tawh a, hengah hian Miami Heat chu an la chak vek a, 3-0 ngawtin hma an hruai tawh a. Milwaukee Bucks tan chuan dam zel turin game sarih khelh turah an chak vek a ngai tawh a ni.

Milwaukee Bucks tan NBA Most Valuable Player ni mek Giannis Antetokounmpo chuan point 21 a thun a, rebound 16 lain assist 9 a nei bawk a, heti chung hian a team te chu a chakpui zo ta chuang lo a ni.

Bucks hi post-season chhunga che tha pawla ngaih an ni a, tunah chuan an dinhmun a tha lo viau mai a. NBA team dangin vawi 139 ngawt mai an tih theih tawh loh chu an tih theih a ngai dawn a, best-of-seven playoff series ah 0-3 a hnufual tawh hnua tlang chho zel thei an la awm lo a ni.

Bam Adebayo chuan Heat tan point 20 a score bakah rebound 16 a la a, Jae Crowder chuan point 17 thunin, Goran Dragic chuan point 15 a thun bawk a, Tyler Herro pawhin bench atanga a luh hnuah point 13 chu a thun ve bawk a ni.

Western Conference top seed Los Angeles Lakers pawhin a hmain Orlando, Florida ah Houston Rockets an hneh lo bawk a, anni hian semi final game khat chiah an la khel a, Rockets chuan 1-0 in hma an hruai a ni.