Anthony Joshua-a promotor Eddie Hearn chuan Anthony Joshua leh Tyson Fury-te chu inhnek tir ngei a tum hle a, a theihtawp a chhuah tur a sawi rualin, he fight hi thlen tir ngei a intiam bawk.

Kan hriat theuh angin Sunday kalta khan British boxer Fury hian Deontay Wilder chu awlsam taka hnehin WBC world heavyweight champion a ni a, Wilder nen hian third fight an nei dawn em tih sawi theih la ni lovin, AJ nen hian an inhmachhawn lovang tih a sawi theih loh bawk.

British boxer AJ hian Andy Ruiz-a lakah a title te a hloh hnuah nikum December thla khan Ruiz hi a hneh a, WBA, IBF leh WBO world heayweight title te chu a la let leh.

Fury leh AJ-te hian tunah hian heavyweight boxing-ah ro an rel meka, British heavyweight boxer pahnih te hian world title awm zawng zawng an kawl veka, mi zawng zawngin he unification fight hi an hmu chak ti ila kan sawi sual tam kher lovang.

AJ hian Ruiz a hneh hnu hian IBF lam atangin Kubrat Pulev-a lakah a title a thap ngei ngei a ngai a, tunah hian inbiakna pawh kalpui mek niin Tottenham Hotspur Stadium chu an inhnekna hmun atan ruahhman a ni mek bawk.

Hearn chuan, “Tu pawhin he fight hi thlen tir an duh a, broadcasting lamah tlem buaina tur awm mahse eng mah tham a ni lo. He fight hi a thleng ngei dawn tih ka tiam che u a, keini hian Kubrat Pulev kan hmachhawn hmasa a nih chuan kan chak a ngai dawna, anni lamin Wilder an hmachhawn hmasa leh a nih chuan hnehna an chan leh a ngai dawn bawk.

“Ka sawi ang hian a thleng ve ve dawna, Fury hian Wilder a hneh leh dawna, Joshua hian Pulev hi chiang takin a knock-out bawk dawn. He fight hi in hmu ngei dawna, he fight a thlen ngei theih nan hian kan theihtawp kan chhuah dawn a ni.

“A hma khan keini leh Team Wilder kha intum tir min tuma mahse inremna kan nei thei lo. Tunah hian lehlam lehlamin he fight hi thlen tir kan duh ve ve a, he fight a thlen theih nan hian tih tak zetin theihtawp kan chhuah dawna, he fight bak hi fight dang a awm chuang lo.

“British world heavyweight champion pahnih undisputed title inchuha inhnek hi kan hmu leh dawn tawh lova, a la thleng ngai lo bawka, a thleng leh tawh dawn bawk hek lo. He fight hi kan thlen tir lo a nih ngat chuan fiamthu mai kan ni dawn. He fight hi a thleng a nih chuan kan chak ngei kan ringa, anni lam pawhin an chak ngei an ringa, chuvang chuan kan lo en mai a ngai dawn a ni,” tiin Sky Sports a hrilh.