Zinedine Zidane chuan Eden Hazard leh Vinicius Junior te chu an khelh dan a inmil lo nia sawiin, a ruala khel chi an nih loh thu a sawi.

Real Madrid chuan £130 million zet sengin Eden Hazard chu Chelsea atangin an lei a, Santiago Bernabeu lamah Belgium forward chu a che fuh rih lo hle a, a inhliam vang leh duh anga a in fit tawk loh avangin beisei a la pha rih lo hle a ni.

Khelmualah Eden Hazard hi Vinicius Junior nen pawh an la lut dun hman lo a, chuti chung chuan Real Madrid manager Zidane chuan heng player pahnihte hi an khelh dan inmil lo niin a sawi a, khel dun chi an nih loh thu hi a sawi chhuak a ni.

Eden Hazard chu a inhliam chhoh avangin a inkhelh tlem phah hle a, a ke tihnat vangin thla hnih bawr vel chu chhawr theih lohin a awm tawh a, inelna hrang hrangah vawi 15 vel chauh a la tel ve thei rih a ni.

Zidane chuan Hazard leh Vinicius te hi a la khelh dun tir lo hrim hrim a, hetianga a pawh hran chhan hi chiang takin a sawi chuang lo a, tactic thil vang te pawh a nih theihna lai a awm a. An khelh dan phung a inang hle a, defensive game an khel ngai lo dun hle a, hei vanga inkawptir lo te pawh a ni ve thei bawk a ni.

Tlema team khauh deuh Barcelona emaw, UEFA Champions League lamah emaw te defensive game khel ngai meuh lo player pahnih inkawptir chu Zidane hian a duh vak a rinawm lo a. Chutih rualin tlema La Liga team nem deuh zawk an hmachhawn hunah te inkawptir ta se, a hlauhawm nep ve deuh thei thung a ni.

Coronavirus vanga inkhel chawlhsan a nih hma khan Real Madrid chu La Liga lamah pahnihna an ni mek a, an hmelma lian Barcelona aiin point 2 in an hniam mek a, game 11 khelh tur an la nei a ni.