Roberto Martinez chuan Eden Hazard chu Real Madrid-ah hmabak eng tak nei nia sawiin, Ballon d’Or pawh a dawn theih a rin thu a sawi.

Eden Hazard chuan 2019-20 season tan hma khan Chelsea chhuahsanin Real Madrid chu €100 million (£89 million/$112 million) zetin a zawm a. Santiago Bernabeu lam a pan hnuah hian Belgium forward chuan beisei a pha rih lo hle.

Inhliam vang leh duh anga a fit tawk loh avangin Eden Hazard chu La Liga club lian tan a la inlan tam lo hle a, Madrid khawpuiah vawi 15 chiah a la inkhel ve a, a ke rek tihnat vangin February 22 hnuah khan a inkhel zui ta rih lo bawk a ni.

Belgium national team head coach Roberto Martinez chuan Eden Hazard chu fakin, a lakah thil ropui tak a la beisei reng thu a sawi chhuak.

Martinez chuan, “Rinhlelh rual lohin Eden Hazard hian Real Madrid-ah hian Ballon d’Or hi a dawng thei ngei ang,” a ti.

“Club dang zawm tirh hi chuan a tlangpuiin a hma anga khelh hi a harsa ve thin a, boruak dang hip nihnaah a khelhna hmasa lama chet that anga chet fuh theih mai loh hi thil awm fo thin a ni,” a ti bawk.

A sawi zelnaah, “Eden pawh hian Real Madrid te ang club ropui taka khelh dan a la zir chian a ngai niin a lang a, amahah thiamna awmin, a rilru leh thinlungah theihtawp chhuah duhna awm mah se boruak hip a inthlak avangin a duh ang takin a la che thei rih lo chauh a ni,” a ti.

“Paris Saint-Germain nen an inkhelh tuma a chet dan thlir khan Eden hian a football khelh dan pawh nuam a ti chho tan tawh tih a chiang a, a team-mate te nen pawh an inpawh chho tan tih a lang thei a ni,” tiin a sawi bawk a ni.