​Hazard chelh turin kan tih theih apiang kan ti ang – Chelsea chairman

18th October 2018, 07:10PM

Chelsea player Eden Hazard chuan tun hnaiah thawm a nei fo va, Real Madrid-in lak an tum mai bakah, amah ngei pawhin Real Madrid pan a chak thu a lo sawi chhuak fo tawh.

Tun nipui pawh khan Madrid club hian Belgium captain hi lakluh tum viau mahse Chelsea lam hian an chhuah pha lova, Hazard hi London-ah cham chhunzawmin, a chhuak lo chu inchhirna a neih loh thu a lo sawi ve tawh bawk.

Hazard a chhuah leh a chhuah loh chungchangah Chelsea chairman Bruce Buck a tawngchhuak ve ta a, Hazard chelh turin an tih theih apiang an tih tur thu a sawi. Buck chuan, “London-a Chelsea fan zawng zawng leh khawvel hmun hrang hranga Chelsea supporter-ten Eden Hazard hi kan ngainain chhuak lo turin kan duh vek. Footballer ropui tak a nih mai bakah mi tha tak a ni tel a, cham zel turin kan duh a, Hazard chelh tur hian kan tih theih awm apiang tih zel kan tum,” a ti.

Hazard hian chhuah a duh avanga Chelsea a nawr luih ve ngai loh tur thu a lo sawi tawh a, tunah Chelsea chairman meuhvin an theih tawp an chhuah dawn thu a sawi tak bawk siah chuan, Chelsea fan-te tan thu lawmawm a ni ngei a, Hazard hi London club-ah a awm zui zel pawh a rinawm zual hle.

Hazard hian Stamford Bridge-ah kum hnih bak contract a nei tawh lova, tunah hian Chelsea hotute lam chuan kum 27 mi hi contract hmui tawk tak zawrh an tum mek a, Hazard hian a ziah ngei pawh an beisei hle.

Hazard hi Chelsea-ah a awm rei ve thawkhat tawh hle a, a thianpa ber Thibaut Courtois chuan Real Madrid a zawm san tawh bawk nen Chelsea lam hi an tan viau a ngai dawn. Chelsea hi an player duh lai chelh thei tak an ni a, sum lam an nei lo vak bik lo bawk nen Hazard hi an chelh thei mai pawhin a rinawm viau a ni.

Copyright © inkhel.com 2024. All rights reserved.