Inrinni zan khan Real Madrid chuan an player man to ber Eden Hazard-a contract an tihtawp thu an puang a, June thla ral rualin Hazard hian Santiago Bernabeu a chhuahsan dawn.

Kum 32 mi hian season khat dang daih Real-ah hian contract la nei mah se, Real hian a contract titawp turin inremna an neihpui a, beisei aia hmain Belgian forward hian Madrid khawpui a chhuahsan dawn a ni.

Hazard-a hmalam hun hi a chiang lo hle a, inkhelh chawlhsan lam pawh a ngaihtuah tel niin chanchinbu mite chuan an tarlang a, Hazard hian inkhelh a chawlhsan dawn nge, club dang a zawm dawn tih tun dinhmunah a la sawi theih rih loh.

Kum 2019 khan Real hian Chelsea atangin Hazard hi an lei a, a man hian add ons zawng zawng nen pound maktaduai 130 a hawlh chho thei a, sawi lan tawh angin Real player man to ber niin, kar khatah pound 400,000 vel zet a hlawh nia sawi a ni.

Hazard hi Chelsea-ah ropui takin khela, Blues tan hian game 352 khelin goal 110 a khung a, mahse Real a pan hnuah erawh a career in hniam lam a pan char char a ni ber a, Los Blancos tan hian game 76 bak khel lovin, goal 7 chiah a khung a, assist vawi 12 a nei bawk.

Real-a a awm chhungin Hazard hian trophy pariat a chawi a; La Liga title pahnih bakah Champions League, UEFA Super Cup, Copa del Rey, FIFA Club World Cup leh Supercopa de Espana te vawi khat theuh a chawi.

Hazard hian tun season-ah Real tan competition hrang hrangah game 10 bak a khel lova, Real a zawm hnuah hian a inhliam avangin game 78 ngawt khelh theih loh a nei a ni.

Real hian Inrinni khan an striker Mariano Diaz pawh a chhuah tur thu an puang a, Mariano hi Real academy chhuak niin, Real senior team-a kum ruk a awm hnuah a inpu chhuak dawn a ni.