​Harsa mahse Barca kan hneh thei – Milner

19th April 2019, 09:04PM

Liverpool player tangkai James Milner chuan Champions League semi-final a an tum tur Barcelona chu an hneh theih thu a sawi a, a awlsam dawn lo tih erawh a hai lo.

Liverpool hian semi-final lut turin quarter-final ah FC Porto chu aggregate-ah 6-1 in an sawp a, Barcelona hian quarter final-ah Liverpool hmelma lian ber Manchester United chu aggregate-ah 4-0 in an hneh ve bawk.

Milner chuan, “Harsa dawn hle mahse Barca hi kan hneh thei tih kan hria. City-a ka awm lai khan vawi hnih Barcelona hi ka lo tum tawh a, kan duh ang result kan nei ngai lo. Tunah a vawi thumnaah erawh ka vanneih ngei tawh ka beisei.

“Team tha tak an ni a, Camp Nou-a khelhpui pawh an harsa em em a mahse kan khelh anga khel hi an la hmachhawn hnem bikin ka ring lo. Camp Nou hi Stadium ropui tak a ni a, inkhelh pawh a nuamin boruak pawh a sang thin hle a, a harsa dawn a mahse kan theihtawp kan chhuah anga, an tan pawh a harsa ve dawn a ni,” a ti.

Sawi zelin Milner chuan, “Season hnih liamta chhung khan Champions League-ah team tha tak tak kan lo hneh tawh a, chuvang chuan eng ang pawhin harsa dawn mahse Barcelona kan khelh hunah inrintawkna kan nei dawn a ni,” a ti bawk.

Liverpool hi tun season-ah an che tha em em a, Premier League leh Champions League-ah te an champion kawp lovang tih sawi theih a ni hauh loh a ni.

Copyright © inkhel.com 2024. All rights reserved.