13 Aug 2019 05:11

inkhel

Harry Maguire mawng a lian mah mah: David Moyes

David Moyes chuan Manchester United a enkawl lai khan Harry Maguire chu a lo enthla tawh tih sawiin, a mawng a lian thei hle niin a sawi a. Centre-back dang a neih nual avangin a la ta lo niin a sawi.

Manchester United chuan Harry Maguire chu Leicester City atangin £80 million ($96 million) zetin an lei a, khawvela defender man to ber a nih theih phah a. David Moyes chuan Old Trafford-ah Sir Alex Ferguson hmun ruak a luah hnu khan Maguire chu £4 million vel chauha lak luh theihna hun tha a neih thu a sawi chhuak a ni.

Moyes chuan Sheffield United defender hlui chu a that zia a hre chiang hle tho tih sawiin, a inkhel lai pawh a hmunah te pawh a en thu a sawi bawk a. Hetiang a nih rual hian Maguire chu lei tul a tih loh avangin a um zui ta lo.

“Khatiang lai khan Harry Maguire hi lak kan tum hran lo a, a che vel erawh kan thlithlai ve nual hman a. League hniam zawka player tam tak chu ka hre bel ve hlawm viau a. Hetiang player te hi Premier League lama an khelh ve hnua hlawhtling tak tak an awm nual tawh a. Harry Maguire hi ka player hriat chian zinga mi a ni,” a ti.

“Vawi khat chu anmahni khelmualah Preston North End an lo mikhual a, league game an khel a. Hemi tuma an inkhel ka en hian a khel chhe hran lo hle a, khatiang hun lai vel khan amah kha a lian lehzual hle a, a mawng phei kha chu lian tak a ni. Ka rilruah khatiang lai pawha khati tiat a nih tawh chuan Harry len zui dan tur chu ka suangtuah chhunzawm a ni,” a ti bawk.

A sawi zelnaah, “Tunah chuan a pian te pawh a ziaawm tawh khawp mai a, a fit hmel zek zawk hle bawk a. Manchester United ka luhchilh tirh khan Nemanja Vidic, Rio Ferdinand, Jonny Evans, Michael Keane, Phil Jones, Chris Smalling tih vel kha kan nei a. Khatiang a nih avang khan centre-half la naupang ve tak pakhat lei belh kha chu a lang pha lo viau a ni,” a ti.

“Harry Maguire khan zinkawng zawh tur a nei a, a chang chuan player te hian an tum ram thleng thei turin zinkawng eng emaw tak an zawh a ngai thin a. Chuti ni lo se Harry hian harsatna lian tham tak pawh a tawk thei a ni,” a ti bawk a ni.

Harry Maguire chuan Sheffield United atanga Manchester United thlenga zinkawng a zawhnaah Hull City leh Leicester City te chu a tlawh kual hmasa phawt a ni.