Ram tana a fehchhuahnaah Manchester United defender Harry Maguire chu a inhliam a, England squad atanga inhnukdawkin, Carrington training-na hmunah a kir leh.

England leh Brazil ten Wembley Stadium-a friendly match an khelh tum khan, United centre-back hi minute 67-naah lakchhuah a ni a, a hliam dan tak erawh sawi a ni lo.

Maguire hian hliam a nei sa hrim hrim nia report a ni a, mahse Brazil hmachhawn tura a fit nia Southgate-a'n a hriat avangin a chhawr ta tho a ni.

United defender bakah hian Man City defender Kyle Walker pawh a inhliam a, ani hi inkhelh tan atanga minute 20-na lekah lakchhuah a ni.

Walker pawh hian Manchester City a pan tawh a, defender pahnih te hian friendly match-a Belgium an hmachhawn hunah an inlan thei dawn lo.

Anni pahnih hmuhruak luahkhat tur hian Southgate chuan Rico Lewis leh James Trafford te a ko. Nikum November thlaa North Macedonia an hmachhawn tum khan Lewis hi England tan a inlan tawh a, Trafford erawh England tan a la inlan lo thung.

Maguire leh Walker te inhliam dan hi chiang taka tarlan a ni lo a, club lamin an tawrh phah viau dawn em tih pawh sawi lawk theih a la ni lo.

England hian forward pahnih inhliam an nei bawk a, Harry Kane leh Saka te chu Brazil hmachhawn team-ah khan an tel tawh lo a, Belgium an hmachhawn hunah pawh an inlan thei dawn lo bawk a ni.