Hammers midfielder thar Payet.

27th June 2015, 01:06AM

West ham United chuan Marseille atangin French midfielder Dimitri Payet an lalut fel a, kum nga daih contract an ziahpui.

Kum 28 mi payet man hi puanzar a ni lo va, season liamta French Ligue 1-a thiante pet goal tur siamsak vawi 17 zet nei thei anih vang hian season thar Premier League ti nghahhlehawmtu pakhat chu a ni ngei ang.

Hammers hian tun nipui transfer chhungin player thar pathum an lalut ta a, Payet hmaah hian Spanish midfielder Pedro Obiang leh Republic of Ireland goalkeeper Darren Randolph-te an lo lalut tawh a ni.

Contract a ziahfel hmain Payet hian West Ham hotute pahnih David Sullivan leh David Gold bakah manager Slaven Bilic a hmu a hemi hnu hian a in ziaklut.

Player fing ti a hriat lar Payet hian tunhnai season ruk chhungin Ligue 1-ah Saint-Etienne, Lille leh Marseille tan a khel kual hman a, hemi hun chhung hian thiante pet goal tura siamsak vawi 51 a nei.

Saint-Philippe leh Saint-Pierroise tan a khelh hnuin kum 1999 khan Le Havre-ah a lut a, AS Excelsior-ah kum hnih khel lehin kum 2008 khan kum 18 mi niin Nantes-in an lalut veleh.

Ligue 1 atanga Nantes hi an tlak tak avangin Saint-Etienne chuan Payet hi an lalut veleh thung a, kum 2012 khan France senior team tan a game hmasa ber chu EURO 2012 qualifying round-a Romania an hneh tumin a khel a 2010-2011 season khan goal 13 a khung.

Kum 2011 nipui lai khan Lille-in an lalut a, 2012-2013 season khan goal 12 khungin thiante pet goal tura siamsak pawh vawi 13 a nei a hemi season-ah tho hian Ligue 1-a game awm zawng zawng (38) a khel vek bawk.

Kum 2013 nipui transfer hunlai khan tuna a chhuahsan tak Marseille hian €11m vel sengin an lei a, L’OM tan hian Ligue 1-ah belhkhawmin game 71 a khel a goal 15 khungin thiante pet goal tura siamsak vawi 21 a nei hman bawk a ni.

France national team tan pawh Payet hian game 15 khelin goal khat a khung tawh.

West Ham hian karleh Ninganiah Europa League qualifying round an khel dawn a, Andorran club FC Lusitans an hmachhawn ang a an midfielder thar hi an chhawr nghal thei ang.

Copyright © inkhel.com 2024. All rights reserved.