Hammers hnehin FA Cup Quarter Final-ah Man Utd

02nd March 2023, 03:03AM

FA Cup Round of 16-ah Manchester United chuan Premier League club West Ham an mikhual a, 3-1 in mual neitu lamin hnehna an chang.

Mikhual lamin goal an khung hmasa, second half tira Benrahma goal chu Manchester United hian rulh tumin an nawr ngar ngar, Aguerd chuan an lamah a ti goal hlauh a, hun tawp dawnah Garnacho leh Fred ten goal an khung leh a, 3-1 in Manchester United an chak ta a, Quarter final an lut ta a ni.

Erik ten Hag chuan Carabao Cup final khel player thenkhat a dahtha nual, Defense laiah Maguire leh Lindelof te an inkawp a, midfield laiah Sabitzer leh McTominay te an inkawp bawk.

First half-ah goal a lut lo, Sabitzer leh Garnacho te shot tha tak chu Hammers goalkeeper Areola chuan a lo dang ve ve a, Maguire leh Lindelof te an che sual dun teuh hle.

Antonio chu free takin an chhuah palh, box chhungah ball a tlan luhpui a, a shot chu De Gea chuan a lo dan sak hlauh.

First half-ah team hnih ten chance an nei ve ve a, inkhel inbuk tawk tak a ni, midfield-ah Hammers an che thei phian, hei vang hian Ten Hag chuan second half tirah McTominay la chhuakin Casemiro a dah lut ta nge nge a.

Second half tan a ni a, West Ham chuan high line pressing game an khel chhunzawm zel. Soucek-a tauh De Gea-a'n a dan hnu deuh lawkah Hammers chuan goal an khung ta nge nge.

Ball a out emaw tiin United player-te an ding hlawm, Hammers lamin an nawr zel si, Minute 55-ah Emerson-a'n mual veilam sir atanga a cross chu Benrahma chuan a chhuih goal ta a.

Ten Hag chuan Lindelof leh Antony te la chhuakin, Rashford leh Lisandro Martinez te a dah lut. Martinez a che sual nghal teuh hle.

Antonio chuan mawi lutukin a bum a, a tlan pel chhunzawm bawk. Box chhung a thlenpui hnuin a shot a, De Gea chuan a lo dan sak leh hlauh mai.

Minute 72-ah Manchester United chuan Casemiro hmangin an siphurh an rul, Garnacho free kick hlawhchhuah chu Bruno chuan petin, Casemiro chuan a tauh goal a, VAR hmanga ennawn a nih hnuin offside ham a ni.

Minute 77-ah Manchester United chuan an siphurh an rul ta nge nge, Bruno Fernandes-a corner pet tha tak chu Aguerd chuan an lamah a tauh goal hlauh mai.

Manchester United chuan 90 mins chhunga hnehna chan ngei an tum, an nawr na tual tual. Minute 90 a ni a, Weghorst-a shot chu defender ten an lo dang per, hei hi Garnacho chuan changin, box veilam sir atangin mawi lutukin bottom corner-ah a thuai lut, 2-1 in Manchester United chuan hma an hruai ta.

Rashford chuan goal dang a khung leh teuh hle, free takin box veilam sirah ball a tlanpui, a shot chu a out chiah chiah. Garnacho goal hi an chakpui dawn emaw tih laiin, bench atanga lut Fred chuan 90+5 mins-ah box chhung chiah atangin mawi takin a chhuih goal ve leh.

3-1 in Ten Hag leh a pawlte chuan hnehna an chang ta a, FA Cup Quarter final an lut ta a ni. Kum 2017 hnuah a vawi khat nan Pathianni khan trophy an chawi, Ten Hag chuan an la duhtawk loh thu a sawi. Tunah hian trophy dang pawh chawi thei turin ke an pen mek zel a ni.

Copyright © inkhel.com 2025. All rights reserved.