Formula 1 driver ni thin Nico Rosberg chuan Lewis Hamilton chu F1 driver ropui Michael Schumacher lehpel thei tura a beisei thu a sawi.

Lewis Hamilton chuan F1 title vawi 5 a la thei dawn hnai ta hle a, kar tawpah Austin-a US Grand Prix-ah a chet that chuan a champion thei tawh dawn a. Kuminah Hamilton hi a champion a nih chuan title vawi 5 a la tling tawh ang a, Michael Schumacher aiin title hi pahnih chauhin a la tlem tawh dawn a ni.

Nico Rosberg chuan Schumacher-a record lehpel thei dinhmuna a din avangin Hamilton chuan phurna leh tumruhna a neih theih phah dawn nia sawiin, hetiang rilru a pu chho a nih phei chuan Michael Schumacher khum theihna hun a nei tha hle niin a sawi.

Hamilton chuan 2013 khan a naupan lai atanga a team duh ber McLaren chu a chhuahsan a, Mercedes a zawm tan a. Hamilton hian Mercedes-ah hian German driver ropui Schumacher hmun ruak a luah chiah a. Schumacher hian a vawi hnihna atan Formula 1 khawvel chu a chawlhsan thu a puang chiah a ni.

2013 leh 2016 inkarah Nico Rosberg leh Lewis Hamilton te chu an inkawp a, anni pahnih hi title la turin an inbei tawk viau nghe nghe a. 2016 khan Rosberg hian Hamilton chu an intlansiak hnuhnung ber, Abu Dhabi-ah khumin driver title chu a la a, a hnu ni rei loteah Formula One a chawlhsan thu a puang zui a, mak tih a hlawh hle.

Rosberg hian a team-mate hlui, a elpui hlui ni bawk chu a dah sang hle a, Formula One driver ropui ber ni thei turin a rin thu hi a sawi a ni.