Max Verstappen chuan Lewis Hamilton chu driver tha tak mai a ni tih sawiin, Pathian a nih bik loh thu a sawi tel bawk.

Dutch driver Max Verstappen chu season liam taah khan vawi thum chu a chak ber a, championship-ah pathumna a ni thei a. Season tan leh hunah chuan Lewis Hamilton chu khum theih a inbeisei thu sawiin, Formula One title vawi 7 a lak theihna kawng daltu nih a tum thu a sawi.

Verstappen chuan, “Formula One huangah chuan car dinhmun hi engkim hriltu a ni ber a. Lewis Hamilton hi driver tha tak mai a ni a, tunah tak phei chuan a tha ber pawl a ni chiang a ni,” a ti.

“Driver tha em em mai a nih rual hian Pathian a ni em lo a, Pathian chuan a awmpui a ni thei a, hei vang ngawt hian Pathian a ni tihna a ni lo a. Heti a nih avang hian hneh theih loh leh tluk theih loh a ni bik lo a ni,” a ti bawk.

Kum 35-a upa Hamilton hian record thar siam theih tur a nei chho nual dawn a, Michael Schumacher tluk theihna tur a nei thei dawn a, F1 intlansiakah vawi 91 a chak ve thei dawn a, title 7 a la ve thei dawn bawk a. Mercedes car hmangin championship hnuhnung 6 ah vawi 5 a chak thei a ni.

“Season tan leh hunah chuan title lak theih ngei kan tum dawn a, a bik takin Mercedes hi tluk theih kan tum dawn a. Kan tum phawt chuan kan phak lohna tur a awm bik lo,” tiin Verstappen chuan a sawi.

Red Bull Racing driver Verstappen hian 2023 thleng contract a ziak thar tawh a, season thar tan vat vat a chak tawh thu a sawi a ni.