Hamilton-a’n Mercedes-ah £40 million contract ziak dawn

27th June 2018, 01:06AM

Lewis Hamilton chuan Mercedes tana rinawm zel a tum hnai a, hmun dang pan loa contract a ziak thar leh a nih chuan kum khatah £40 million a hlawh ang.

British driver Hamilton hian Mercedes-ah contract a ziak thar a nih chuan British infiammi zinga hlawh sang ber a ni thei dawn a. Contract chungchangah hian Mercedes leh Hamilton te hi an indawr chho reng a, an inrem thei lawk lo a, tunah chuan an inrem tan a, July 8 a British Grand Prix an tlan hmain engkim a chiang hman tura ngaih a ni.

Hamilton hian contract thar a ziak a nih chuan Mercedes-ah hian 2019 leh 2020 season chu a la awm chhunzawm dawn a. A hmaa kum khat dang belh leh theih tura thu an dah thin kha a rem dawn rih lo a, 2021 hian inkaihhruaina chu siam danglam a nih hmel a, hei vang hian hemi thu chhuak hi an nghak phawt ang.

Mercedes team principal Toto Wolff chuan an driver chhuanvawr chungchang an puan hun tur chu sawi a rem rih lo niin a sawi a, tluang taka inbiakna an neih tawh thu erawh a sawi thung a. Mercedes F1 chairman Niki Lauda chuan, “Lewis hian kan car a la khalh zel dawn,” a ti.

Forbes chuan tun hnaia infiammi sum lalut hnem an tar chhuahah Lewis Hamilton hi Briton infiammi dang, boxer Anthony Joshua leh Real Madrid star Gareth Bale te aiin an dah chungnung zawk a. Tuna an contract thar turah hian Hamilton chuan a hmaa a hlawh aia £8 million a tam a hlawh tawh ang.

Contract ziah fel hunah Hamilton hian Ferrari driver Sebastian Vettel (£38 million) aiin a hlawh sang dawn bawk a, heti a nih chuan Formula One driver zinga hlawh sang ber a ni thei dawn bawk a ni.

Copyright © inkhel.com 2024. All rights reserved.