Lewis Hamilton chuan Formula 1 huangah kum 14-na a hmang mek a, a lo berah kum thum vel chu a la intlansiak dawn tih a sawi.

British driver Lewis Hamilton hian Formula 1 driver ropui ber tia sawi Michael Schumacher a um chho zel a. German driver in grand prix a chak hnem ber record a lo siam tawh, vawi 91 chak theih chu Hamilton hian a hnaih tawh hle a, vawi 86 chak tawhin, tun season chhungin record hi a khum theih a rinawm hle.

Hamilton hian Schumacher hi kawng dangah pawh a nihrual theih hmel viau bawk a, Schumacher-a’n world title vawi 7 laa record a lo siam tawh chu Hamilton hian a tluk ve thei tura ngaih a ni bawk.

“Engmah hi sawi chian theih leh sawi lawk theih a awm hauh lo a, chutih rual chuan 2021 British GP ah tel ka tum leh tum loh min zawttu an awm a, tel ngei chu ka tum dan a ni,” tiin Hamilton chuan a sawi.

“Kuminah chuan entu mipui an awm a thiang lo a, kum thar lamah chuan mipui thahnem takin a hmunah kan intlansiak lai hi an rawn en theih tawh ka beisei a. Chumi hunah chuan kan inhmu khawm vek turah ngai phawt ang,” a ti bawk.

A sawi zelnaah, “Eng chena rei nge ka la intlansiak zel dawn tih chu ka la sawi thei mai lo a. Eng anga rei nge ka tel peih dawn tih pawh ka hre thei lo. Tuna ka ngaihtuah thiam danah chuan a lo berah kum thum tal hi chu intlansiak ka la tum ang,” a ti.

“COVID lockdown hian season a tibuai a, kan nunphung a tibuai nasa hle a. Chutih rual chuan a eng lam zawngin thlir ila, hawi thawvenna hun kan neih theih phah a, Formula 1 ni lo, thil dang ngaihtuahna hun tha te kan neih ve theih phah a, a lawmawm angreng phian a ni,” tiin Hamilton chuan a sawi a ni.

“A theih anga rei intlansiak zel hi ka duh dan ber chu a ni mai a, ka sawi tawh angin a tlem berah kum thum chhung chu ka la intlansiak ngei ka ring,” a ti.