23 Mar 2020 05:58

inkhel

Hamilton-a’n COVID-19 kara mahni hmasial a dem

Lewis Hamilton chuan tunlaia coronavirus darh mek kara mahni hmasial taka che thinte chu na taka a dem thu a sawi.

Vawi 6 ngawt Formula 1 world champion ni thei Lewis Hamilton chuan khawvel hmun hrang hranga coronavirus darh mek timuang thei tura rual pawl lo tura inchahna chu mi tam takin an ngaipawimawh lo hle tih a sawi a. Hetianga thu zawm tha duh lote chu midang ngaihtuahna nei lo leh mahni hmasial niin a sawi chhuak.

COVID-19 vangin khawvel ram hrang hrangte chu an inkharkhip mek a, khawlaia chhuak lo turin an inchah nasa a, loh theih loha chhuakte pawh midangte hnaih lo thei ang bera awm zel turin an inchah hlawm a. Hetiang a ni chung hian he hri leng kai tawh hi 3,20,000 chuang zet an ni tawh a, mi 14,000 chuang zet chuan an thih phah tawh bawk a ni.

Mercedes driver Lewis Hamilton chuan social media kal tlangin thuneitute thil sawi chu zawm turin mipui hnenah a chah thar a, sorkar thu chu zawm hram tura a duh thu a sawi a ni.

Hamilton chuan, “Khawvel hmun hrang hrangah hri leng mek vanga nunna chan an pung zel hi a lungchhiatthlak ka ti a. Tih theih kan nei tam lo hle a, kan tih theih ber chu chhuahvah loh a ni mai,” a ti.

“Theihtawpa kan fimkhur a ngai a, chhuah tam loh a pawimawh hle a, he hri leng kai ve lo tur leh thehdarhtu ni lo tura kan inven uluk a ngai a. Fimkhur taka kan hun kan hman a pawimawh em em lai hian puipunna hmuna kal an la awm teuh a, hetiang mite hian an ngaihtuah tlem a, mahni hma an sial em em a ni,” a ti bawk.

A sawi zelnaah, “Tunlai boruak hahthlak tak karah mahni nunna derthawng thei pawh pawisa loa mi tana inpe doctor te leh nurse te bakah hetiang lama thawktu hrang hrangte hi kan pasalthate an ni a, an tan kan tawngtai fo a ngai,” a ti.

“Kan chhungkaw himna atan ka tawngtai thin a, chutih rual chuan hri leng dotute tan pawh ka tawngtai bawk thin a. Mi tana thawktute zawng zawng hi pasaltha vek an ni a, dam tak leh him taka an awm zel ka duhsak a ni,” tiin a sawi.