14 May 2019 07:24

inkhel

Hamilton-a’n cancer vei naupang F1 car a pe

Lewis Hamilton chu Spanish Grand Prix-ah pakhatna a ni a, hetiang dinhmuna a din theih chhan chu mipa naupang, kum 5 mi, cancer natnain a tihbuai mek vang a nih thu a sawi a. Lawmthu sawi nan Hamilton hian mipa naupang hi Formula 1 car a thawn a ni.

Pathianni khan Barcelona khawpuiah Hamilton chu pakhatna a ni a, drivers’ championship-ah hmahruaitu a nih leh theih phah a. Mipa naupang kum 5 mi, cancer vanga dam chhuak tawh lo tur Harry Shaw tan a chak chu a hlan a. An intlansiak hma hian Shaw chuan Hamilton chu duhsakna a hlan a, pakhatna a nih hnuah hian Lewis chuan F1 car hi a thawn a ni.

Cancer nen an inbeihnaa Harry Shaw huaisenna chuan Mercedes staff te thinlung a dek fuh hle a. Ruahmanna siamin, Hamilton-a khalh hnu F1 car hlui pakhat chu Shaw te in bula dah ngei chu an titlu a. An chenna Merstham, Surrey ah car mai ni lo, Spain rama trophy leh Hamilton-a steering wheel te chu an pe tel bawk a ni.

Staff pakhat chuan Barcelona khawpui atangin Pathianni zanah khan thilpek pe tur hian thlawhtheihna hmangin England hi a pan a, hemi hnu hian Spain-ah test nei turin a kir leh nghal a ni.

Harry Shaw-a nu Charlotte leh a pa James te chuan thla kaw chhung zet an lo buaipui tawh, an fapa natna Ewing’s Sarcoma enkawlna tur sum tuak dan an ngaihtuah a. August 2, 2018 khan Harry chu a cancer a ni tih hi an hmu chhuak a, a taksaa bawk awm chu an scan a, alu tiat vela lian a ni tawh a, khawl hmanga an en hnuah a ruha bawk awm chu cancer a ni tih an finfiah a ni.

Ewing’s Sarcoma hi cancer chi danglam tak niin, hetiang vei hi an tam lo hle a. A tlangpuiin kum 10 atanga kum 20 inkar mite chuan an vei thin a, a tam zawkah chuan tih dam harsa vak loa ngaih a ni.

Internet kaltlanga Harry inenkawlna tura an siam page-ah chuan, “Harry hi thlamuang tak leh nuamsa takin a thi ngei ang tih kan ring a. Mahni chenna inah, mahni khumah, a toys hual velnaah, a hmangaihte bulah ngei a hun tawp a hmang dawn a ni,” tiin an tarlang.

“A nihna takah chuan tun hnai kar eng emaw zat chhung chu Harry hian na a tuar nasa hle a. Amah ang bawk naupang kum 5 mi lek tawrh atana rapthlak khawp hi a tuar a ni,” an ti a.

“A chhungte tan chuan mahni rila rah ngei mai thih hun nghaka thlir tawp mai chu thil harsa tak leh hrehawm em em mai a ni a. Hetiang hun kan tawng hi a chhe ber kan thleng ta a nih pawhin theihnghilh a harsa tawh khawp ang a, khuareiah chuan a la reh ve thei maithei tih vel chauh a ni,” an ti bawk.

“Harry hun tawp hma hian amah anga mi dangin an hun an hman ve loh nan eng emaw tak tih hi kan duh hle a. Chemotherapy a tih lai vel pawhin Harry thu sawi nasat ber chu ‘Ti ila a ni mai alawm’ tih hi a ni,” tiin an tarlang bawk a ni.