​Hamilton-a’n a F1 title parukna a la

04th November 2019, 02:11PM

British driver tha Lewis Hamilton chu United States Grand Prix-ah pahnihna niin a Formula One World Championship title parukna a la.

Hamilton hi kum 2008, 2014, 2015, 2017 leh 2018-te khan a lo champion tawh bawka, F1 chanchinah world champion ni hnem ber pahnihna hauhvin, F1 legend Michael Schumacher chiah a pha tawh lo.

Hamilton hian point a hmuh san fal tawh em avangin world title la tur hian US GP-ah a chak kher a ngai lova, US GP-ah hian a team-mate Valtteri Bottas chu pakhatna niin Hamilton hi a dawtah a awma, a world title parukna a la tho a ni.

Hamilton hi a hma chuan Argentine legend Juan Manuel Fangio nen an world title lak zat a inanga, an pahnih hian world title la hnem ber pahnihna hauh dun mahse tunah chuan kum 34 mi Hamilton hian Fangio hi a tlansan.

Tun season-ah race 19 tlan tawh a ni a, chung zingah chuan Hamilton hi race 10-ah chakin, tuanh hian Brazilian GP leh Abu Dhabi GP te chiah an awm tawh.

Hamilton hi a la upa lutuk lova, a mah ngei pawhin a la that belh zel thei tih thu a lo sawi tawh bawk avangin F1 chanchina driver ropui ber leh hlawhtling ber Michael Schumacher chu a khum theih mai ring tu pawh an thahnem viaua, Schumacher hian world title 7 la in Hamilton hian pakhat chiah a pha tawh lo mek a ni.

Formula One world champion ni hnem tawh te:

7- Schumacher
6 - Hamilton
5 - Fangio
4 - Prost, Vettel

Copyright © inkhel.com 2024. All rights reserved.