Mercedes driver Lewis Hamilton chu a vawi nga nan Formula One world champion a ni a, Michael Schumacher chiah Hamilton aia world champion ni hnem a awm ta.
Sunday khan Mexican Grand Prix tlan a ni a, Hamilton hi pasarihna aia hniama a awm loh phawt chuan champion tur chiang sa a ni tawh. British driver hi Mexican GP-ah hian palina niin a champion zui ta a ni.
Mexican GP-ah hian Red Bull driver Max Verstappen chu pakhatna niin, Ferrai driver Sebastian Vettel chu pahihna a ni a, Ferrari driver dang Kimi Raikkonen chu pathumna a ni a, Hamilton chu palina niin, Mercedes driver tho Valtteri Bottas chu pangana a ni bawk.
Hamilton hian a world championship title pangana a lak takah chuan F1 driver awm tawh zawng zawnga ropui ber zinga mi a ni ngei tawh a, F1 world champion vawi nga emaw a aia tam ni thei hi Hamilton bakah hian mi pahnih; Manuel Fangio leh Michael Schumacher-te bak an la awm lo.
Fangio hian kum 1950 chho bawra F1 driver a ni a, vawi nga world champion ni tawhin, German driver Schumacher erawh a sang fal nalh a, vawi sarih lai world champion a ni tawh thung.
Hamilton chuan world champion vawi ngana a lak chungchang sawiin,”A nuam dangdai em em a, he hmunah hian kan champion a ni ringawt lova, vawi tam tak kan intlansiak a, rim taka kan thawh hnua champion kan ti.”
“Kum 13 mi chauh ka ni lai atang tawhin Mercesdes-ah ka awm a, Fangio pawhin Mercedes nen tho hetiang hi a lo ti tawh bawk. Ka lawmin nuam ka ti em em a, awih a har hle a ni,” a ti.
Mercedes boss Toto Wolff chuan, “Kan driver-te hi an career a zawh hma chuan media lamah kan fak emaw kan sawi ve ngai lova, mahse tunah chuan Lewis hi kan chawimawi lo thei lo. Lewis hian Fangio –a record a nih rualpui chiah a, amah ang hi an tam lo a ni,” a ti ve bawk.
Formula One world title la hnem top 5 leh an lak zat:
Michael Schumacher – 7
Juan Manuel Fangio – 5
Lewis Hamilton – 5
Alain Prost – 4
Sebastian Vettel - 4
Mexican Grand Prix 2018 result :
1. Max Verstappen – Red Bull
2. Sebastian Vettel – Ferrari
3. Kimi Raikkonen – Ferrari
4. Lewis Hamilton – Mercedes
5. Valtteri Bottas – Mercedes
6. Nico Hulkenberg – Renault
7. Charles Leclerc – Sauber
8. Stoffel Vandoorne – McLaren
9. Marcus Ericsson – Sauber
10. Pierre Gasly - Scuderia
