05 Apr 2020 04:56

inkhel

Hall of Fame-ah Kobe Bryant an la lut

Kobe Bryant chu Naismith Memorial Basketball Hall of Fame-ah an la lut.

Vawi nga ngawt NBA champion ni thei Kobe Bryant, 41 chu kumin January thlaah khan a fanu kum 13-a upa Gianna leh mi dang pasarihte nen helicopter in an chesual a, helicopter chhunga chuang zawng zawng hi chhan theih an ni lo a ni.

Los Angeles Lakers legend Bryant hian 2016 kumah khan basketball khelh a chawlhsan a. A vanglaiin chawimawina eng eng emaw a dawng nual hman a, 2008 NBA Most Valuable Player a nih bakah Finals MVP atan pawh vawi hnih an thlang a, All-Star ah vawi 18 ngawt a tel hman a ni.

Bryant khan United States basketball team chu 2008 Olympic leh 2012 Olympic-ah te gold medal a lo lakpui tawh a ni.

NBA commissioner Adam Silver chuan Kobe Bryant thihna chu sawi thiam harsa khawpa pawi a nih thu sawiin, league chuan a phu ang taka chawimawi ngei ngei hi an tum hle niin a sawi.

Adam Silver chuan, “Kobe Bryant kha NBA All-Star nen hian a inhmeh bik ngawih ngawih a, he game hi khawvel hmun hrang hrangah a chawisang em em a ni,” a ti.

“Khawvel ram hrang hranga he game ngainatute tana theihtawp chhuah kha a tum em em thin a, a tha ber berte zingah kha leh chen kha a hun a lo hmang ve tawh a, a tha ber pawl a ni,” a ti bawk.

Vawi nga ngawt San Antonio Spurs NBA champion lo nihpui tawh Tim Duncan bakah 2008 kuma Boston Celtic champion puitu Kevin Garnett te pawh Hall of Fame-ah hian lak luh an ni.

Hall of Fame hi basketball hmu chhuaktu, Canadian physician Dr. James Naismith hming chawiin Naismith Memorial Basketball Hall of Fame tiin a hming an vuah a ni.