​Halep a inhliam

01st October 2018, 05:10AM

Hmeichhe tennis player world no.1 Simona Halep chu a inhliam avangin China Open atangin first round-ah a inhnukdawk.

Ons Jabeur lakah Halep a khel tha lova, first set chu Jabeur hian 6-1 a lain, minute 31 an inkhelh hnuah Romanian player Halep hi a hnungzang a nat avangin a inkhel chhunzawm thei lo.

Inkhelh zawh hian Halep chuan a hnungzang na chungchang hi sawiin, “Ka hnungzangah na ka nei a, ka duh angin ka che tha theilo bawk nen, ka khel chhunzawm thei ta lo a ni. Ka khel zo theilo hi pawi ka ti a, ka khelh luih zel chuan ka tan a thalo zual dawna ka hriat avangin ka khel chhunzawm duh ta lo a ni,” a ti.

“Hnung na neih hi a hreawm em em a, kan kun thei lova, ball lokal hi kan duh angin kan la hman lo,” a ti bawk. Halep hian a hnungzang na hi kar hmasa lam khan a lo hriat tawh thu a sawi tel nghe nghe.

China Open inkhel dangah defending champion Caroline Garcia chuan Chinese mi Wang Yafan chu 7-6 (12-10), 6-7(4-7), 6-3 in a hneh. Third seed Angelique Kerber chuan French mi Kristina Mladenovic chu 6-2, 6-2 in a hneh bawka, ninth seed Sloane Stephens chuan Anastasia Pavlyuchenkova chu 67(8-10), 6-4, 6-4 in a hneh bawk.

Copyright © inkhel.com 2024. All rights reserved.