Haier 1st Division League chu September ni 22, 2015 zan khan Chanmari YMA Hall-ah neih a ni ta. 1st division-ah hian club pariat an awm a, October 5, 2015 (Thawhtanni) atanga khelh tan tur a ni a, Zonet chuan live telecast-in an pe chhuak dawn a ni.
Aizawl District Football Association President Pu Robert Romawia Royte chuan,"1st Division League neih hi hruaitu ten kan chakna a rei tawh lutuk, chutih laiin sum hrawm a nat em avangin kan huphurh a. Mahse mi thil phal tak te an rawn lang a, anni puina azarah leh Club-te zarah kan nei thei dawn ta a, kan lawm tak zet a ni." tiin a sawi.
Club Jersey phochhuah a ni a, Club tin aiawhin model ten home jersey an rawn ha chhuak a, player ten away jersey an rawn ha chhuak bawk a ni. Oath taking Danny Lalawmpuia chuan player te a neihpui bawk a ni.
Pu PC Lalthanliana (Hon'ble Minister Social Welfare Deptt, etc,& Patron, ADFA) chuan Haier 1st Division League a kick off a, thu sawi chhunzawm nghalin, Zonet Cable Network leh Haier company, mimal inphal, Sawrkar hotu leh Association hruaitute zarah ADFA 1st Division League changtlung tak neih a ni dawn ta chu lawmawm a tih thu a sawi a ni. He inkhawm hi Pu Vanlalrawna (Hony.Secretary,ADFA) chuan lawmthu sawina hun hnuhnung hmangin hun a khar ta a ni.
Haier ADFA 1st Division League final hi point hmu sangber leh a dawttu ten an khel ang a. Club tin te hian lawmman an dawng vek dawn a, champion team chuan cheng nuaikhat aia hniamlo an dawng ang. Pariatna chuan cheng singkhat aia tlemlo an dawng dawn bawk a ni. Mimal lawmman awm thei zawng zawng siam vek a ni bawk anga, fair play lawmman pawh siam a ni ang , inkhel en man pawh siam a ni dawn bawk a ni.
Haier 1st Division League Kickoff 2015